Paris. Trend:

Visa qlobal ödəniş şəbəkəsinin təhlükəsizlik arxitekturasını modernləşdirərək onu süni intellekt dövrünə uyğunlaşdırır. Bu dövrdə maliyyə əməliyyatlarının getdikcə daha böyük hissəsi süni intellekt agentləri tərəfindən həyata keçiriləcək.

Trend-in xüsusi müxbirinin verdiyi məlumata görə, bunu Visa Ödəniş Forumunda keçirilən məlumat sessiyasında Visa-nın texnologiyalar üzrə prezidenti Racat Taneca bildirib.

Taneçanın sözlərinə görə, süni intellekt artıq yaxın illərdə istifadəçilər adından məhsul axtarmaq, qiymətləri müqayisə etmək, danışıqlar aparmaq, alış-veriş etmək və bir çox digər əməliyyatları müstəqil şəkildə həyata keçirə biləcək.

«Ticarət insanın qərar qəbul etdiyi modeldən süni intellektin qərar verdiyi modelə keçir. Buna görə də əsas sual artıq ödənişin necə qorunması deyil, süni intellektin həqiqətən istifadəçi adından hərəkət etdiyini, lazımi səlahiyyətlərə malik olduğunu və əməliyyatları onun maraqları naminə həyata keçirdiyini necə təsdiqləməkdir», - deyə o bildirib.

O qeyd edib ki, süni intellektin yayılması ilə kibertəhdidlərin xarakteri də dəyişir.

«Əvvəllər dələduzluq insanlar tərəfindən həyata keçirilirdisə, indi süni intellektin formalaşdırdığı və inkişaf etdirdiyi təhdidlər dünyasına keçirik. Bu isə o deməkdir ki, etibar artıq yalnız tranzaksiya anında yoxlama ilə məhdudlaşa bilməz. Qarşılıqlı əlaqənin bütün mərhələlərində fasiləsiz təmin edilməlidir», - deyə Taneça vurğulayıb.

Onun sözlərinə görə, müasir süni intellekt sistemləri zəiflikləri müstəqil şəkildə aşkar etmək, məlumatları təhlil etmək, mürəkkəb fəaliyyət zəncirləri qurmaq və insan müdaxiləsi olmadan hücumlar həyata keçirmək qabiliyyətinə malikdir.

«Əgər hücumlar avtonomlaşırsa, müdafiə də avtonom olmalıdır — daha sürətli reaksiya verməli, baş verənləri daha dərindən təhlil etməli və yeni təhdidlərə daim uyğunlaşmalıdır», - deyə o qeyd edib.

Bununla əlaqədar olaraq Visa ayrı-ayrı təhlükəsizlik alətlərini deyil, şirkətin bütün texnoloji platformasını modernləşdirir.

«Biz statik müdafiə modellərindən kimin, hansı səlahiyyətlər əsasında, hansı məqsədlə və hansı kontekstdə hərəkət etdiyini, həmçinin bu davranışın zamanla necə dəyişdiyini təhlil edən dinamik və kontekstual modellərə keçirik», - deyə Taneça bildirib.

Bundan əlavə, Visa telemetriya məlumatlarının və rəqəmsal siqnalların fasiləsiz təhlilinə əsaslanan arxitektura inkişaf etdirir. Bu yanaşma potensial təhdidləri əvvəlcədən proqnozlaşdırmağa, onlara avtomatik reaksiya verməyə və müdafiə mexanizmlərini daim təkmilləşdirməyə imkan yaradır.

«Biz bütün ödəniş infrastrukturunun müdafiəsini başdan sona elə qururuq ki, o, süni intellekt dövrünün gətirəcəyi yeni təhdid modellərinə hazır olsun», - deyə Taneça vurğulayıb.