“Rusiya Parisdə həbs edilən Telegram-ın qurucusu Pavel Durovu rus kimi dəstəkləməyə hazırdır, lakin sahibkarın həm də Fransa vətəndaşlığına malik olması vəziyyəti çətinləşdirir”. Modern.az TASS-a istinadən xəbər verir ki, bunu Rusiya prezidentinin mətbuat katibi Dmitri Peskov bildirib.
"Ümid edirik ki, cənab Durovun hüquqi müdafiəsini təşkil etmək üçün bütün lazımi imkanlar var", - Kreml sözçüsü deyib.
“Təbii ki, onun Rusiya vətəndaşı olduğunu nəzərə alaraq, biz bütün lazımi dəstəyi göstərməyə hazırıq, lakin onun həm də Fransa vətəndaşı olması burada vəziyyəti çətinləşdirir”.
Xatırladaq ki, Telegram-ın təsisçisi Pavel Durov avqustun 24-ü axşam saatlarında “Le Burje” hava limanında saxlanılıb. Hadisə Durov şəxsi təyyarəsindən enərkən baş verib. Fransa mətbuatının yazdığına görə, Durov ölkədə axtarışda olanlar siyahısında yer alıb.
Paris prokurorluğu bu gün məlumat yayıb ki, Pavel Durovin həbsi kibercinayətlə bağlı aparılan istintaq çərçivəsində daha 48 saat müddətinə uzadılıb.