Rusiyanın Ukraynaya kütləvi raket hücumu nəticəsində ölənlər var, həmçinin elektrik enerjisi kəsilib.
Modern.az BBC-yə istinadən xəbər verir ki, səhər saatlarında bütün Ukraynada hava hücumu xəbərdarlığı elan edilib.
Partlayışlar barədə bir neçə regionun - Odessa, Dnepropetrovsk, Volın, İvano-Frankivsk, Zaporojye və Lvovun hakimiyyət orqanları məlumat verib.
Volın vilayətinin Lutsk şəhərində yaşayış binasına ziyan dəyib, bir nəfər ölüb. Bu barədə şəhərin meri İqor Polişçuk məlumat verib. Poltava vilayətində sənaye obyektinə ziyan dəyib, 5 nəfər xəsarət alıb. Bu barədə regional hərbi administrasiyanın rəhbəri Filip Pronin teleqram kanalında yazıb.
Zaporojye vilayətində səhər hücumu nəticəsində bir nəfər, Dnepropetrovsk vilayətində bir nəfər ölüb. Raket hücumundan sonra bütün Ukraynada enerji təchizatında problemlər yaranıb. Kiyevdə bir neçə rayon işıqsız qalıb, su təchizatında fasilələr qeydə alınıb. Lvov və Nikolayev vilayətlərində də elektrik enerjisi kəsilib.
Elektrik qatarlarının hərəkətində fasilələr müşahidə olunur.