Telegram-ın baş direktoru Pavel Durovun gizlədə biləcəyi heç nə yoxdur.
Modern.az xəbər verir ki, bu açıqlalama ilə Telegram Şirkətinin rəhbərliyi çıxış edib. Bildirilib ki, Telegram messengeri Avropa İttifaqı (Aİ) qanunlarına uyğun fəaliyyət göstərir və Fransa hakimiyyətinin ittihamlarını absurd hesab edir.
“Telegram Rəqəmsal Xidmətlər Aktı da daxil olmaqla Aİ qanunlarına uyğundur. Onun moderasiyası sənaye standartlarına cavab verir və daim təkmilləşdirilir. Durovun gizlədə biləcəyi heç nə yoxdur və o, tez-tez Avropanı gəzir. Platformanın və ya onun sahibinin bu platformadan sui-istifadəyə görə məsuliyyət daşıdığını iddia etmək absurddur”, – şirkət öz Telegram kanalında bildirib.
Messencer rəhbərliyi həmçinin qeyd edib ki, Pavel Durovun həbsi ilə bağlı vəziyyətin tezliklə həllini gözləyirlər. Şirkət qeyd edib ki, 1 milyarda yaxın istifadəçi Telegram-dan təkcə rabitə vasitəsi kimi deyil, həm də məlumat mənbəyi kimi istifadə edir.
Xatırladaq ki, Telegram-ın sahibi və baş direktoru Pavel Durov Fransada saxlanılıb. Fransa hakimiyyəti iş adamının bir sıra cinayətlərdə əli olduğundan şübhələnir. Onu 20 ilə qədər həbs cəzası gözləyir.