Rusiya Gürcüstan və onun ərazisində yaradılmış separatçı qurumlar olan Abxaziya və Cənubi Osetiya arasında vasitəçilik təklifi ilə çıxış edib.
Modern.az TASS-a istinadən xəbər verir ki, bunu Rusiya Xarici İşlər Nazirliyinin mətbuat xidmətinin rəhbəri Mariya Zaxarova açıqlayıb.
"Rusiya regionda davamlı sülhün bərqərar olması üçün Tbilisi, Suxum və Sxinvali arasında dialoqun inkişafına kömək etməyə hazırdır", - Zaxarova bildirib.
O qeyd edib ki, Moskva Cenevrə müzakirələrində Tbilisi, Suxum və Sxinvali arasında güc tətbiq etməmək haqqında sazişin hazırlanmasına başlamasının tərəfdarıdır.
Gürcüstan-Cənubi Osetiya və Gürcüstan-Abxaziya dövlət sərhədlərinin delimitasiyası prosesinə başlanması sərhədyanı ərazilərin sabitləşməsinə töhfə verəcək", - Zaxarova belə deyib.
Xatırladaq ki, 2008-ci ilin 8 avqustunda baş vermiş Rusiya-Gürcüstan müharibəsində Moskva Abxaziya və Cənubi Osetiyaya qoşun yeridib. Bu bölgələrdə yalnız Rusiya və bir neçə Moskvayönümlü xarici siyasət yürüdən ölkələr tərəfindən tanınan qondarma dövlətlər yaradılıb.