Birləşmiş Millətlər Təşkilatı (BMT) Fələstinli qaçqınlara yardım agentliyi olan UNWRA-da çalışan 9 əməkdaşın oktyabrın 7-də Həmas-ın rəhbərlik etdiyi İsrailə hücumda əli ola biləcəyini açıqlayıb.
Modern.az BBC-yə istinadən xəbər verir ki, BMT baş katibinin sözçüsü Farhan Haq bildirib ki, 9 nəfərin hamısı işdən çıxarılacaq.
Haq bildirib ki, İsrailin UNWRA əməkdaşlarının insidentdə iştirak etdiyinə dair iddiaları ilə bağlı BMT-nin başlatdığı təhqiqat başa çatıb: “Bizim üçün hücumlarda istənilən iştirak Fələstin xalqı adından görməli olduğumuz işə böyük xəyanətdir".
Oktyabrın 7-də baş verən hücumda 1200-ə yaxın insan həlak olub, 251 nəfər girov götürülərək Qəzzaya aparılıb. HƏMAS-ın idarə etdiyi səhiyyə nazirliyinin məlumatına görə, o vaxtdan bəri İsrailin Qəzzaya hücumları nəticəsində 39 mindən çox fələstinli həlak olub.
İsrail ordusunun sözçüsü bildirib ki, hesabat UNWRA-nın “yeni aşağı həddə çatdığını” göstərir.
UNRWA 1949-cu ildən Fələstinli qaçqınlara yardım edir.