Almaniyada ultra-sağçı “Almaniya üçün Alternativ” (AfD) Partiyasının təbliğat posterində Hitler salamına eyham görünüb.
Modern.az "Bild"ə istinadən xəbər verir ki, sentyabrın 22-də Brandenburq əyalətində yeni regional parlament seçiləcək.
Bu səbəbdən həftə yarımdır orada seçki plakatları asılıb. Bu seçkilərdə AfD ən güclü partiya olmaq niyyətindədir və fəal şəkildə təbliğat aparır.
Belə ki, AfD-nin Frankfurt an der Oderdən olan deputatı Vilko Möller öz seçki plakatında xoşbəxt ailəni - divanda oturan üç sarışın uşaq və onların arxasında duran iki valideyni təsvir edib.
Plakatda deyilir: “Uşaqlarınızı qoruyuruq”.
Afişadakı böyüklər əllərini qaldırırlar, görünür, bu, uşaqların üstündəki damı simvollaşdırır. Lakin afişadakı adamların eyni zamanda jesti Hitler salamını çox xatırladır.
“Bu afişa məqbul olanın sərhədlərini zorlayan qəsdən hazırlanmış təxribatdır. Şəhərimizin bir çox vətəndaşının nümayəndəsi kimi bu cür görüntülərə qarşı tədbir görməyi özümə borc bilirəm. Sağçı populist qüvvələr qəsdən şəhərimizin imicini korlamaq üçün çalışırlar”, - deyə Frankfurt an der Oderdəki Sol Partiyasının sədri Anya Kreysel bildirib.
Möllerin seçki kampaniyası zamanı qalmaqalla üzləşməsi ilk dəfə deyil. O, üzərində "Mən ağam - və bu çox yaxşıdır!" stikeri olan ağ avtomobil sürür. İyulun 20-də Adolf Hitlerə sui-qəsdin 80-ci ildönümündə Möller "TikTok"da video yayımlayıb. Burada o, nasist diktaturası ilə Almaniya Federativ Respublikası arasında paralel aparıb.