İyulun 27-də İsrailin nəzarətində olan Holan təpələrinin bir hissəsi Livan ərazisindən kütləvi atəşə tutulmasından sonra regionda yeni müharibə təhlükəsi yaranıb.
Modern.az xəbər verir ki, İsrail ordusu 12 nəfərin ölümü ilə nəticələnən hücuma görə Hizbullahın məsuliyyət daşıdığını bildirib.
Qeyd olunur ki, Hizbullah İran raketlərindən istifadə edərək İsrail ərazisinə hücum edib. Hizbullah İsrailin iddialarını təkzib edib və hücumdan iştirak etmədiyini bəyan edib.
İsrail rəsmiləri hücuma görə cavab veriləcəyini elan edib. Hələlik cavabın miqyası bilinmir.
Belçika, Fransa və Norveç Xarici İşlər Nazirlikləri Livanda olan vətəndaşlarını dərhal ölkəni tərk etməyə çağırıb.
İsrailin baş naziri Benyamin Netanyahu ölkənin yüksək səviyyəli təhlükəsizlik rəsmiləri ilə məsləhətləşmələr aparıb. Ona raket hücumuna cavab olaraq bir neçə hərəkət variantı təqdim edilib.
"Ynet" portalının İsrail rəsmilərinə istinadən verdiyi məlumata görə, Livana cavab zərbəsi ağır, ancaq məhdud olacaq. Mənbə bildirib ki, zərbə genişmiqyaslı müharibəyə səbəb olmayacaq. Bununla belə, nəşrin mənbələrinin fikrincə, Hizbullahın İsrailin belə bir addımına reaksiyası həmişəkindən daha kəskin ola bilər.
Livanın LBCI telekanalı isə bildirir ki, İsrail rəhbərliyi artıq Livandan qisas almaq qərarına gəlib.
Qeyd edək ki, BMT Yaxın Şərqdəki bütün tərəfləri maksimum təmkinli olmağa çağırıb.