Bakı. Trend:

ABŞ-nin dövlət katibi Marko Rubio cümə günü “Kubada müsbət dəyişiklik istəyənləri” Mərkəzi Kəşfiyyat İdarəsinə (MKİ) müraciət etməyə çağırıb. Bu çağırış Vaşinqtonun qonşu kommunist adasına təzyiqləri artırdığı bir vaxta təsadüf edib.

Trend xəbər verir ki, Marko Rubio “X” sosial şəbəkəsində yazıb: “Kubada müsbət dəyişiklik etmək istəyənlər üçün fürsətdir, ya indi, ya da heç vaxt”.

“Yerinə yetirilməmiş vədlərin yaratdığı məyusluq, korrupsiya və kiçik bir qrup insanın imtiyazlı həyat tərzi fonunda MKİ ilə məxfi tərəfdaşlıq vasitəsilə istədiyiniz dəyişikliyi yaratmaq üçün bu fürsətdən istifadə edin”, – deyə o əlavə edib.

Bu çağırış bir neçə baxımdan diqqət çəkir. İlk növbədə, o, kommunist adasında mübahisəli keçmişə malik MKİ-nin fəaliyyət göstərdiyini dolayısı ilə etiraf edir. İkincisi isə, hakimiyyət dəyişikliyinə işarə edir.

1962-ci ildən ABŞ-nin embarqosu altında olan Kubaya Donald Tramp administrasiyası tərəfindən təzyiqlər daha da artırılıb. ABŞ yanvar ayında neft embarqosu tətbiq etməklə blokadanı sərtləşdirib və bu, elektrik enerjisinin təkrar-təkrar kəsilməsinə səbəb olub.

Bununla yanaşı, dövlət şirkətlərinə və Raul Kastro da daxil olmaqla, Kuba rəhbərliyinin nümayəndələrinə qarşı sanksiyalar vasitəsilə Havanaya təzyiqlər də gücləndirilib.