İranın vəliəhd şahzadəsi Rza Pəhləvi hakimiyyət dəyişikliyi baş verəcəyi təqdirdə ölkənin demokratiyaya keçidini təmin etməyə və azad seçkilər keçirməyə hazır olduğunu bəyan edib.

Modern.az xəbər verir ki, o, bu barədə Vaşinqtonda keçirdiyi mətbuat konfransında danışıb. 

Rza Pəhləvinin sözlərinə görə, onun “demokratiyaya keçid üçün aydın yol xəritəsi” mövcuddur və bu plan hakimiyyət dəyişikliyindən dərhal sonra - “qələbənin ertəsi günü” həyata keçirilməlidir. O bildirib ki, keçid prosesi dinc, sabit və planlı şəkildə baş tutmalıdır.

Pəhləvinin təqdim etdiyi yol xəritəsi dörd əsas prinsipə əsaslanır. Bunlara İranın ərazi bütövlüyünün qorunması, dinin dövlətdən ayrılması, bütün vətəndaşlar üçün şəxsi azadlıqların və bərabərliyin təmin edilməsi, eləcə də xalqın demokratik idarəetmə formasını azad şəkildə seçmək hüququ daxildir.

İranın vəliəhd şahzadəsi qeyd edib ki, bu plan ölkənin iqtisadi bərpası üçün də əsas çərçivə rolunu oynayacaq və biznes dairələrinin nümayəndələri tərəfindən dəstəklənir. Onun sözlərinə görə, sözügedən yol xəritəsi iqtisadi sabitliyin bərpasına və inkişafın təmin edilməsinə yönəlib.

Pəhləvi beynəlxalq müşahidə altında konstitusiya prosesinin başladılacağını və bu prosesin yekununda “azad və ədalətli seçkilər”in keçiriləcəyini vəd edib.