İranın ali lideri Ayətullah Seyid Əli Xamenei ölkədəki iğtişaşları düşmənlərin planı kimi pisləyərək, ABŞ-ın zorakılığı qızışdırmağa çalışdığını iddia edib.

Modern.az xəbər verir ki, Tehranın İmam Xomeyni məscidində çıxış edən ali lider  bildirib ki, bir qrup vandal "ABŞ prezidentini məmnun etmək" üçün paytaxtda və digər şəhərlərdə binaları dağıdıb.

Ayətullah Xameneinin sözlərinə görə, öz ölkəsini idarə etməkdə və ya ABŞ-da müxtəlif hadisələrlə məşğul olmaqda aciz olan prezident Donald Tramp onları İran administrasiyası müəyyən tədbirlər görərsə, üsyançıların tərəfini tutmaqla hədələyib.

Xamenei 12 günlük müharibəni xatırladaraq bildirib ki,  ABŞ prezidentinin əli 1000-dən çox iranlının qanına bulaşıb. O deyib ki, Donald Tramp 2025-ci ilin iyun ayında baş verən 12 günlük müharibə zamanı hərbi komandirlər, elm adamları və adi insanlar da daxil olmaqla 1000-dən çox iranlının həyatına son qoyan hücumlara əmr verdiyini etiraf edib. İranın ali lideri ABŞ prezidenti tərəfindən aldadılan və "Trampı razı salmaq üçün" zibil qutularını yandıran bir qrup cahil şəxsə sərt reaksiya verib. Xamenei hökumət əleyhinə etirazçıları "qarışıqlıq yaradanlar" və "vandal dəstəsi" adlandıraraq, onların sadəcə "ABŞ prezidentini razı salmağa çalışdıqlarını" bildirib. Beynəlxalq insan hüquqları təşkilatlarının məlumatına görə, İranda aksiyalar 14-cü gündür ki, davam edir və bu etirazlar zamanı 51 nəfər, o cümlədən 9 yeniyetmə öldürülüb. Məlumatlara görə, etirazlarda yüzlərlə insan yaralanıb. Etirazlar dekabrın 28-də başlayıb və ABŞ-da yerləşən İnsan Haqları Aktivistləri Xəbər Agentliyinin (HRANA) məlumatına görə, indiyədək 2277 nəfər saxlanılıb.