Modern.az saytının “Bir şəklin tarixçəsi” rubrikasında təqdim etdiyi bu foto uzaq 80-ci illəri xatırladır. Foto Azərbaycan SSR Kommunist Partiyası Mərkəzi Komitəsinin birinci katibi Heydər Əliyev və xanımı Zərifə Əliyeva SSRİ-yə rəhbərlik edən rəsmilərlə bir arada olatrkən lentə alınıb. Zaman - 1981-ci il... Məkan - Ukrayna SSR-in Krım yarımadası, Nijnyaya Oreanda kəndindəki “Qlitsin” dövlət bağ evi... SSRİ-yə rəhbərlik edən şəxslər bağ evində istirahət edirlər. Soldan sağa: Azərbaycan SSR KP MK-nın birinci katibi Heydər Əliyev, SSRİ xarici ticarət nazirinin birinci müavini Yuri Brejnev (Leonid Brejnevin oğlu) SSRİ mülki aviasiya naziri Boris Buqayev, xarici işlər naziri Andrey Qromıko, Sovet İttifaqı Kommunist Partiyası Mərkəzi Komitəsinin baş katibi Leonid İliç Brejnev, Andrey Qromıkonun həyat yoldaşı Lidiya Qromiko, Brejnevin həyat yoldaşı Viktoriya Brejneva və nəvəsi, Boris Buqayevin həyat yoldaşı Vera Buqayeva, Sov.İKP katibi Konstantin Çernenkonun həyat yoldaşı Anna Çernenko, Konstantin Çernenko, Heydər Əliyevin həyat yoldaşı Zərifə Əliyeva. “Qlitsin” dövlət bağ evi 1955-ci ildə SSRİ-nin əvvəlki rəhbəri Nikita Xruşşov üçün inşa edilmişdi. Amma ikimərtəbəli malikanədə sovet rəhbərlərindən ən çox dincələn Leonid İliç Brejnev olub. Hazırkı məlumatlara görə, “Qlitsin” malikanəsi 2020-ci ildə 1,2 milyard rubla satılaraq özəlləşdirilib. Daha ora dövlət mülkiyyəti deyil, özəl mülkdür. SSRİ rəhbəri Leonid İliç Brejnev mərhum Heydər Əliyevə həmişə yaxşı münasibət bəsləyib. Bunun sayəsində Heydər Əliyev sonralar Moskvaya aparılmış və SSRİ rəhbərləri sırasında yer almışdı. O, SSRİ Nazirlər Soveti sədrinin birinci müavini vəzifəsində çalışıb.
A.Qorxmaz