Ukrayna prezidenti Volodimir Zelenski CNN-nin jurnalisti Fareed Zakariaya müsahibə verib. Modern.az-ın məlumatına görə, müsahibə zamanı Zelenski bildirib ki, Kiyev hələ də Rusiya ərazisindəki hədəflərə ABŞ istehsalı olan uzaqmənzilli silahlarla zərbə endirmək üçün Vaşinqtondan icazə almayıb. Onun sözlərinə görə, Ukrayna Rusiya hərbi bazalarına və hərbi aerodromlarına hücum etmək üçün belə silahlara ehtiyac duyur. Kiyev hazırda icazə gözləyir.
"İndi Rusiya təyyarələrini geri çəkməyə başlayıb. Bizə daha çox icazə lazımdır", - Zelenski deyib.
Rusiya prezidenti Vladimir Putin isə Ukraynaya NATO silahlarından Rusiya ərazisində istifadəyə icazə verilməsi ilə bağlı xəbərlərə münasibət bildirib. Putin deyib ki, Rusiyaya qarşı yüksək dəqiqliyə malik uzaqmənzilli Qərb silahlarından istifadə NATO ölkələrinin Ukraynadakı döyüş əməliyyatlarında birbaşa iştirakı anlamına gələcək.
"Onları yalnız NATO və ABŞ verə bilər. Bu baş verərsə, Qərb birbaşa döyüşlərdə iştirak edəcək. Bizim üçün yaradılacaq təhdidlərə əsaslanaraq müvafiq qərarlar qəbul edəcəyik”, - Putin bildirib.
Məsələ ilə bağlı Modern.az-a danışan türkiyəli hərbi ekspert Abdullah Ağar bildirib ki, Ukrayna müharibəsi ən kritik dövrə qədəm qoyub:
"Qərb dünyasının verdiyi silahlardan Rusiya içərisində istifadəsi olunması məsələsi müzakirə edilir. İndi ABŞ-ın, Britaniyanın, eləcə də Fransa və Almaniyanın verdiyi silahlar Rusiyada istifadə olunarsa, müharibənin NATO ilə Rusiya arasında olduğunu göstərəcək. Putin buna sərt cavab verəcəklərini, müharibənin fərqli məcralara yayılacağını qeyd edib. İndi NATO və ABŞ da bunu hesablayır. Bunu biz “siçan dişləməsi” adlandırırıq. ABŞ Rusiyanın reflekslərini test edə-edə onu istədiyi nöqtəyə çəkməyə çalışır. Burada da açığı müharibəni idarə etməyə çalışır".
Ekspert vurğulayıb ki, Rusiyanın verəcəyi cavablar olduqca vacibdir:
"Rusiya əvvəllər müharibənin öz torpaqlarında yayılmasını "qırmızı xətt" elan etmişdi. Hazırkı vəziyyəti qəbul edib. İndi də "Qərb silahlarından istifadə edilə bilməz" deyir. Lakin Qərb silahlarından istifadə olunur. Məsələn, taktiki təkərli vasitələrdən, tanklardan istifadə edirlər. Bu baxımdan, Rusiyanın fikirlərindən çox atdığı addımları görmək lazımdır. Amma bir reallıq var ki, Rusiya çox ciddi şəkildə müharibə mənbələrini məhv etməyə yönəlib. Misal üçün, Rusiya Lvovu vurur. Polşadan gələn silah yollarını, Ukraynanın infrastrukturunu vurur. Ukayndakı xarici əsgərlərin olduğunu düşündüyümüz yerləri vurur. Qərbin buna cavabı olduqca vacibdir. Məsələn, Böyük Britaniya silahlarının Kurskda istifadəsini istəmədi. Rusiya olduqca önəmli xəbərdarlıqlar edir. Amma xəbərdarlıqları nə qədər həyata keçirə biləcək məsələsi müəmmadır".