Müəllimlərin işə qəbulu üzrə (MİQ) imtahanlar hər zaman gündəmdə olan məsələlər arasındadır. Bəzi müəllimlər bu imtahanların ləğv edilməsinin, onun yerinə pedaqoji ixtisaslara qəbul və məzun olma prosesinin çətinləşdirilməsinin tərəfdarıdır.
Mövzu ilə bağlı Modern.az-a danışan elm və təhsil eksperti Elnur Aydın bildirib ki, Azərbaycanda müəllimlərin işə qəbulu prosesinə münasibət bildirmək üçün təhsili inkişaf etmiş ölkələrin müəllimlərinin işə götürülməsi prosesini araşdırmaq lazımdır:
“Cənubi Koreya, Almaniya, Yaponiya, Sinqapur, Finlandiya kimi təhsili yaxşı inkişaf ölkələrin heç birində Azərbaycanda olduğu kimi yalnız nəzəri, yəni akademik biliklər yoxlanılıb müəllim işə götürülmür. Adlarını qeyd etdiyim ölkələrdə müəllimlərin işə qəbulu üçün təkcə nəzəri biliklərlə imtahan olunması kifayət etmir. Praktik bacarıqların yoxlanılması, hətta bəzi ölkələrdə əlavə müəyyən praktik təcrübənin olması da tələb oluna bilir. Təhsili yaxşı inkişaf etmiş ölkələrin müəllim işə qəbulu prosesinə uyğunlaşmaq istəyiriksə, ali məktəblərin pedaqoji ixtisaslarında verilən təhsil yalnız nəzəriyyə üzərində qurulmamalıdır. Bacarıqların formalaşdırılması, tələbələr üçün praktiki təcrübələrin innovativ təlim texnologiyalarına və innovativ təlim metodlarına əsaslanması lazımdır. Biz pedaqoji ixtisasda təhsil alan tələbəyə nə veririksə, onu yoxlamağa çalışırıq. Yəni nəzəri biliklər öyrədirik deyə nəzəri imtahanla onları işə qəbul etməyə çalışırıq. Bu zəif yanaşmadır”.
Müsahibimizin sözlərinə görə, Azərbaycan müəlliminin nəzəri biliklərinin yaxşı olması peşəkar müəllim olma anlamına gəlmir:
“Bildiklərini tətbiq edib auditoriyaya çatdırmaq bacarığı formalaşdırılmalı, hələ tələbə ikən yaxşı praktiki təcrübə keçmə imkanları verilməlidir. Yalnız bundan sonra biz müəllim olmaq istəyən namizədləri biliklərlə yox, biliklərin tətbiqi, praktiki bacarıqları ilə sınağa çəkib müəllim kimi işə götürməliyik. Pedaqoji ixtisaslardan məzun olmuş namizədlərdə nəzəri biliklərlə yanaşı, praktiki bacarıqlar formalaşdırmalıyıq. Sonra müsabiqə və ya müsahibə yolu ilə onları yoxlaya bilərik. Bu işi yaxşı qura bilsək, Azərbaycan təhsilinin gələcək inkişafına mühüm töhfələr vermiş olarıq”.