Moskvada BRİCS media forumu keçirilib. Toplantıda Beynəlxalq Jurnalist Şurasının sədri Mehmet Ali Dim də iştirak edib.
Mehmet Ali DİM forumla bağlı Modern.az-a danışıb.
O, bildirib ki, toplantıya 50 ölkədən 120-yə yaxın jurnalist qatılıb:
"BRİCS meda forumunda təşkilat olaraq təkcə Beynəlxalq Jurnalistlər Şurası təmsil olunurdu. Sədr müavini İsmayıl Beyazit da yanımdaydı. BRİCS media zirvəsi TASS İnformasiya Agentliyinin təşkil etdiyi toplantıdır. Tədbirə təqribən 50 ölkədən 120-yə yaxın jurnalist qatılmışdı. Onların arasında BRİCS-ə üzv olan ölkələrin də jurnalistləri var. BRİCS-in qurucu üzvləri dünya əhalisinin 70 faizini təşkil edir. İqtisadi potensialları da böyükdür. Dolayısı ilə təşkilat bütün ölkələrin iştahını qabardır. Media zirvəsi olduğu üçün daha çox media məsələləri danışıldı. Bu ölkələr arasında media əlaqələri, təşkilatın inkişafı və həmrəyliyin artırılması istiqamətində medianın necə rol oyanyacağı ilə əlaqədar fikirlər səsləndirildi. İlk toplantı iki hissəli olub: sabahdan günortaya qədər, günortadan sonrakı hissə. Bu zaman daha çox ölkələrdən təmsilçilərin çıxışları oldu. Bu şəxslər öz ölkələrinin önəmli jurnalistləridir. Digər jurnalistlər isə ölkələrinin rəsmi informasiya agentliklərinin əməkdaşları idi. BRİCS-in sosial-iqtisadi böyüklüyünə fokuslanmış kütlə vardı".
Türkiyəli jurnalist Rusiya Xarici İşlər Nazirliyinin sözçüsü Mariya Zaxarovunun çıxışının reakiyalara səbəb olduğunu deyib:
"Açılış mərasimində Rusiya xarici işlər naziri Sergey Lavrovun çıxışı oldu. O, BRİCS-in dünya üçün əhəmiyyətindən danışdı. Rusiya XİN-nin sözçüsü Mariya Zaxarova da oradaydı. Onun uzun bir çıxışı oldu. Zaxarovanın çıxşı reaksiyalara səbəb oldu. Çünki jurnalistlərin bəzən çox fərqli xəbərlərlə hadisələri kontekstdən çıxardığından bəhs edərək, daha həssas və məsuliyyətli olmalarından danışdı. Xüsusilə də, Rusiyanın müharibə şəraitində olduğu bir vaxtda onun əleyhinə həyata keçirilən yayımların narahatlıq doğurduğunu söylədi. Bir sözlə, jurnalistlərə bir az da “barmaq silkələdi” deyə bilərik. Təbii ki, bu çıxış belə sərt, qəlb qıran deyildi. Amma ümumi götürsək, bütün çıxışlar daha pozitiv idi. TASS İnformasiya Agentliyinin 120 illiyi ilə əlaqədar Rusiyanın Böyük teatrı sadəcə media nümayəndələri üçün xüsusi tamaşa göstərdi. Tamaşasının açılışında da Rusiya Prezidenti Vladimir Putinin mesajı səsləndirldi. Bu zaman Putin həm media nümayəndələrinə xitaab etdi, həm də BRİCS-lə bağlı fikilərini dilə gətirdi. O, BRİCS-in daha fərqli yerlərə gedəcəyindən, dünya üçün təşəbbüslər irəli sürəcəyindən danışdı.
İkinci gün toplantı yarım gün, yəni sabahdan günortaya qədər oldu. Bu zaman daha çox ənənəvi mediadan dijital mediaya keçiddən, BRİCS-in göstərə biləcəyi təşəbbüslərdən danışıldı. Ölkələr arasında texnoloji yeniliklərin istifadə olunması məsələsinə də toxunuldu".
Jurnalist ölkəsinin BRİCS üçün müraciət edib-etmədiyindən də danışıb:
"21-23 oktyabr tarixlərində Tatarıstanın paytaxtı Kazanda BRİCS liderlərinin toplantısı keçiriləcək. Cənab Prezidentimiz Rəcəb Tayyib Ərdoğanın da bu toplantıya qatılması gözlənilir. Hesab edirəm ki, Türkiyə orada "yol xəritəsi"ni müəyyən edəcək. Yəni Türkiyənin BRİCS-ə qoşulmaq üçün müraciət edib-etməyəcəyi, qoşulub-qoşulmayacağı müəyyən olunacaq".