Son günlər Zəngəzur dəhlizi ilə bağlı müzakirələrin intensivləşməsi İranı ciddi narahat edir. İslam Respublikasının rəsmiləri Zəngəzur dəhlizi əleyhinə ard-arda bəyanatlar verirlər. Rəsmi Tehran Zəngəzur dəhlizini özünün “qırmızı xətti” olduğunu deyib. İranın Ermənistandakı səfiri Mehdi Sobhani dünən ölkəsinin Zəngəzur dəhlizi ilə bağlı mövqeyini belə ifadə edib: “İran əmin edir ki, “Zəngəzur dəhlizi” deyilən layihə reallığa çevrilə bilməz”. O əlavə edib ki, Ermənistanın ərazi bütövlüyü onlar üçün “qırmızı xətt”dir. İranın xarici işlər naziri Abbas Arakçı də oxşar açıqlama ilə çıxış edib. O, X hesabında bildirib ki, qonşu dövlətlərin sərhədlərindəki hər hansı dəyişiklik İran üçün "qırmızı xətt" deməkdir və bu, “tamamilə qəbuledilməzdir”. Bu açıqlamalar bir daha onu göstərir ki, İran Zəngəzur dəhlizini mühüm geosiyasi rıçaq kimi görür və Türkiyənin regionda artan təsirindən ehtiyatlanır. Zəngəzur dəhlizi Ermənistandan keçməklə Naxçıvanla Azərbaycanı birləşdirəcək quru yoludur. Rəsmi Bakı tələb edir ki, İrəvan Naxçıvana maneəsiz keçid versin. Ermənistan isə hələ kə məsələnin həllini uzadır. Siyasi ekspert Elxan Şahinoğlu İran rəsmilərinin tez-tez “Qırmız xətt” ifadəsindən istifadə etməsinə münasibət bildirib. Modern.az-ın məlumatına görə, E.Şahinoğlu bildirib ki, “qırmızı xətt” söhbəti artıq lətifəyə çevrilib, müxtəlif liderlər bu barədə kimlərisə xəbərdar etsələr də, “qırmızı xətlər” aşılır da, yanından keçilir də: “ABŞ-ın keçmiş prezidenti Barak Obama Suriya lideri Bəşər Əsədi xəbərdar edirdi ki, o, kimyəvi silahdan istifadə etsə, bu, Vaşinqton üçün “qırmızı xətt”in keçilməsi olacaq. Əsəd kimyəvi silahdan rəqiblərinə qarşı istifadə etdi, Suriyanın bəzi məntəqələrdə zəhərlənmədən ölənlər oldu, Obama “qırmızı xətt”i aşan Əsəd cəzalandırmadı. Rusiyanın xarici işlər naziri Sergey Lavrov bir müddət əvvəl deyib ki, “ABŞ Rusiyanın “qırmızı xətt”ini aşmamalıdır”. ABŞ Ukraynaya hərbi texnika və raketlər göndərib və Kiyev bu silahlarla Rusiyaya qarşı savaşmaqdadır, beləcə Kremlin “cizgiləri” aylardır aşılıb. Moskvanın Vaşinqtonu cəzalandıracaq yeganə aləti nüvə silahıdır ki, Kreml bu haqda çox danışsa da, düyməyə basmayacaq.
Növbəti “qırmızı xətt” söhbətini Tehran atıb ortaya. İranın mühafizəkar dairələri hər dəfə Zəngəzur dəhlizi üçün “qırmızı xətt” ifadəsini işlədirlər. Yəni demək istəyirlər ki, Azərbaycan, Ermənistan, Türkiyə, hətta Rusiya İranın “qırmızı xətt”ini nəzərə alaraq Zəngəzur dəhlizini reallaşdırmamalıdırlar. Zəngəzur dəhlizi mövzusu Azərbaycanla Ermənistanın daxili işidir, Bakı İrəvanla razılaşdıqdan sonra Tehranın məntiqsiz “qırmızı cizgiləri” asanlıqla aşılacaq”.