Bəzən müqavilə imzalayan zaman bəndlər çox kiçik şriftlə yazılır, bu da gələcəkdə tərəflər arasında anlaşmazlığa, hətta dələduzluğa yol aça bilir.
Mövzu ilə bağlı Modern.az-a danışan Azərbaycan Vəkillər Kollegiyasının üzvü Turan Abdullazadə bildirib ki, Azərbaycan Respublikası Mülki Məcəllənin 746-1.4-ci maddəsinə əsasən, borcverən tərəfindən verilən məlumatlar aydın və başa düşülən şəkildə ifadə edilməlidir:
“Həmin Məcəllənin 746-2.2-ci maddəsinə əsasən, istehlak krediti müqaviləsində rekvizitlər aydın və dəqiq şəkildə göstərilməlidir. Lakin vətəndaş unutmamalıdır ki, balaca şriftlərlə yazılmasını əsas gətirərək kredit müqaviləsi üzrə öhdəliklərindən yayına bilməz. Belə ki, vətəndaşı kredit müqaviləsi bağlamağa heç kim məcbur etmir. Müqavilə tərəflərin könüllü iradə ifadəsini əks etdirir. Bu səbəbdən müqavilə imzalanıbsa balaca şriftlər artıq ikinci dərəcəli rol oynayacaq”.
T.Abdullazadə bildirib ki, hər bir halda vətəndaşın müqaviləni imzalamazdan öncə daha böyük ölçülü şriftlərlə həmin müqaviləni bankdan tələb etmək hüququ var:
“Həmçinin vətəndaşın balaca şrift ölçüsünə görə müqavilə bağlamaqdan imtina etmək hüququ var. Lakin banklar da unutmamalıdır ki, qanunvericiliyin tələblərinə əsasən müqavilə şərtləri aydın və başa düşülən olmalıdır”.