Britaniya vətəndaşlarının bu gün öz ölkələrinin tarixi ilə bağlı hiss etdikləri qürur 10 və ya 30 il əvvəl olduğu qədər böyük deyil.
Modern.az xəbər verir ki, məlumatlar Milli Sosial Tədqiqatlar Mərkəzinin britaniyalıların sosial mövqeyi və milli kimliyi ilə bağlı 1,6 mindən çox insan arasında keçirdiyi sorğuya əsaslanan hesabatında yer alıb.
1995 və 2013-cü illərdə britaniyalıların müvafiq olaraq 83%-i və 86%-i tarixlə fəxr etdiklərini bildiriblərsə, 2023-cü ildə bu rəqəm cəmi 64%-dir. Sorğular göstərir ki, Britaniya demokratiyasının işləməsi ilə fəxr edənlərin sayı da 30 il ərzində azalıb: 1995-ci ildə vətəndaşların 60%-i bunu deyirdisə, 2013-cü ildə onların payı 69%-ə yüksəlib, 2023-cü ildə isə 53%-ə düşüb.
1995-ci ildə olduğu kimi, 2023-cü ildə də eyni sayda britaniyalı ölkənin siyasi nüfuzu ilə fəxr edib - 48%, lakin 2013-cü ildə bu rəqəm 59% təşkil edib. Lakin Britaniyanın ölkənin incəsənət və ədəbiyyatda əldə etdiyi nailiyyətlərlə fəxr etmə səviyyəsi son 30 ildə 69%-dən 79%-ə, idman nailiyyətləri ilə fəxr etmə səviyyəsi isə 70%-dən 77%-ə yüksəlib.
Hesabat müəllifləri tarixlə fəxr etmə səviyyəsində əhəmiyyətli dəyişiklikləri onunla izah edirlər ki, Böyük Britaniya son illərdə daha az millətçi olub və vətəndaşlar öz ölkələrinin müasir dünyada yeri haqqında daha çox düşünməyə başlayıblar.