Monqolustanda iki günlük səfərdə olan Rusiya prezidenti Vladimir Putini Ulan-Batorun mərkəzi meydanında ölkə prezidenti Uxnaaqiyn Xurelsux qarşılayıb.
Modern.az Rusiya mətbuatına istinadən xəbər verir ki, mərasimdə Rusiya nümayəndə heyətindən xarici işlər naziri Sergey Lavrov, energetika naziri Sergey Tsivilev, "Rosatom"un rəhbəri Aleksey Lixaçev, baş nazirin müavini Aleksey Overçuk, prezidentin beynəlxalq məsələlər üzrə köməkçisi Yuri Uşakov, nəqliyyat naziri Roman Starovoyt, “Rosneft”in rəhbəri İqor Seçin və başqaları olub.
Vladimir Putin bir gün əvvəl Ulan-Batora gəlib. Onun Monqolustanda ölkə prezidenti ilə danışıqlar aparacağı və bir sıra sənədlər imzalayacağı gözlənilir. Rusiya prezidenti SSRİ və Monqolustan silahlı qüvvələrinin Xalxin-Qol çayında yapon qoşunları üzərində birgə qələbəsinin 85-ci ildönümü ilə bağlı tədbirlərdə iştirak edəcək.
Monqolustana səfərindən sonra Putin Vladivostoka gedəcək və burada sentyabrın 3-dən 6-dək keçiriləcək Şərq İqtisadi Forumunda iştirak edəcək.