Gürcüstanda seksual zorakılıqda təqsirli bilinən müxalifətçi Qoqi Tsulaya prezident Salome Zurabişvilidən aktiv siyasətə qayıtmaq üçün əfv olunmasını xahiş edib.
Modern.az Gürcüstan mətbuatına istinadən xəbər verir ki, qiyabi olaraq 4 il həbs cəzasına məhkum edilən siyasətçi 2022-ci ilin yayından xaricdədir.
61 yaşlı Tsulaya özünü siyasi qaçqın və “İvanişvilinin məhbusu” sayır. O, hesab edir ki, məhkəmə onun işi ilə bağlı ədalətsiz qərar çıxarıb. Tsulaya 2021-ci ilin martında saxlanılıb, iyulda isə 6 min lari girov müqabilində həbsdən azad edilib. Hökm çıxarılmazdan əvvəl o, siyasi sığınacaq almaq üçün Fransaya uçub.
İstintaq iddia edir ki, Tsulaya intim əlaqə yaratmaq məqsədilə 42 yaşlı dostunu döyüb. Tiflis məhkəməsi seksual cinayəti təsdiqləmədən onu qismən təqsirli bilib. Daha sonra Apellyasiya Məhkəməsi cinsi təcavüz ittihamını bərpa edib.
Tsulaya Gürcüstan hakimiyyətinə qarşı sərt bəyanatları ilə tanınır.