Bu gün Azərbaycanda Parlament seçkiləri keçirilir. Səhər saat 08:00-dan vətəndaşlar qeydiyyatda olduqları seçki məntəqələrinə gedərək səs verməyə başlayıb.
Modern.az Bakıda bir neçə seçki məntəqəsində olub.
7 saylı seçki dairəsinin 10 saylı seçki məntəqəsinin sədri Lalə Əliyeva bildirib ki, sözügedən məntəqədə 1147 seçici qeydiyyatdadır. Proses yaxşı gedir.
“İnnovasiya və Rəqəmsal İnkişaf Agentliyi tərəfindən təqdim edilən sistemə uyğun olaraq vətəndaşların “MyGov” elektron sistemi vasitəsilə səs vermələri üçün də şərait yaradılıb. Lakin belə bir müraciət edilməyib”.
Dairənin 9 saylı seçki məntəqəsinin sədri Əkbərova Nigar isə 1089 nəfər seçicinin qeydiyyatda olduğunu deyib. "Heç bir qanun pozuntusuna rast gəlinməyib. Müvafiq sənədləri üzərində olmayan şəxslər gün ərzində seçki məntəqəmizə yaxınlaşsa da, onlara lazımi sənədlər haqqında məlumat verilib", - o qeyd edib.
23 saylı Nəsimi – Səbail seçki dairəsinin 37 saylı seçki məntəqəsində 1124 seçici qeydiyyatda olub.
“Məntəqə üzrə 11 nəfərə isə evlərində səs vermələri üçün daşınan seçki qutusu göndəriləcək. Məntəqədə vətəndaşların “MyGov” elektron sistemi ilə səs vermələri üçün şərait yardılıb, hələ ki, belə bir müraciət edilməyib”, - məntəqənin sədri Könül Təhməzova deyib.