Bu gün Azərbaycanda Parlament seçkiləri keçirilir. Səhər saat 08:00-dan vətəndaşlar qeydiyyatda olduqları seçki məntəqələrinə gedərək səs verməyə başlayıb.
Modern.az 7 saylı Səbail seçki dairəsinin 2 saylı seçki məntəqəsində olub.
7 saylı Səbail seçki dairəsinin 2 saylı seçki məntəqəsinin sədri Süleyman Əliyev bildirib ki, ümumilikdə 1343 nəfər seçici bu seçki məntəqəsində qeydiyyatdadır.
"Seçicilər arasında ilk dəfə səs verənlər də var. Proses öz axarı ilə gedir. Rusiyadan, Konqodan və başqa ölkələrdən müşahidəçilər var. Heç bir qayda pozuntusu qeydə alınmayıb" - o deyib.
Seçicilərin də fikirlərini öyrəndik.
İlk olaraq 18 yaşlı seçici Ayaz Mənsimovla qarşılaşdıq. O, ilk dəfə bir seçkidə iştirak etdiyini dedi və təəssüratlarını bizimlə bölüşdü:
"Səsverməyə gəlməyi istəyirdim. İlk dəfə səs verdim və xoş hisslər keçirdim. Namizədlər arasında müəyyən məsələləri nəzərdən keçirib seçim etdim".
İlk dəfə səs verənlərdən biri də İsgəndər İbadov idi. O bizə namizədini necə müəyyənləşdirdiyindən danışdı:
"İlk dəfə səs verdim. Həyacanlı idi. Səs verdiyim namizədin vədlərinə inandım, inanıram".
Elşən İsayev adlı seçici isə namizədlərini tanımadığını, lakin onların tarixçələrinə baxıb qərar verdiyini söyləyib:
"Namizədlərin heç birini tanımırdım. Sadəcə tarixçələrinə baxıb, harada işlədiklərinə filan nəzər yetirdim. Açığı səs verdiyim namizədin qazanacağına inanmıram. Amma mən yenə də öz vətəndaşlıq borcumu yerinə yetirdim".
Əkbərova Sürəyya və Alıyeva Günəş adlı xanımlar seçkiyə birgə gəlmişdilər. Onlar səs verdikləri namizədin qazanmasını istədiklərini bildiriblər.