Almaniyanın 3 şərq əyalətində rusiyayönümlü partiyaların qalib gəlmək şansı yüksəkdir.
Modern.az xəbər verir ki, bu barədə "Politico" yazıb.
Nəşr yazır ki, artıq sentyabr ayında Almaniyanın Brandenburq, Saksoniya və Türingiya əyalətlərində regional seçkilər keçiriləcək və bu seçkilərdə rusiyayönümlü və radikal sağçı olan AfD partiyası hər üç regionda birinci yeri tuta bilər. Həmçinin Rusiyaya dost fikirlərə sadiq qalan yeni yaradılmış solçu BSW partiyası da sürət qazanır.
Məqalədə deyilir: “Beləliklə, Moskva Soyuq Müharibə zamanı onilliklər boyu hökmranlıq etdiyi geniş keçmiş Şərqi Almaniyada öz yerini bərpa edə bilər”.
Materialda göstərilən son sorğulara görə, ifrat sağ və sol mövqelərdə olan Moskvaya dost partiyalar hər 3 regionda ümumilikdə ən azı 50 faiz səs almalıdır.
Qeyd olunub ki, bütün partiyalar AfD qədər açıq şəkildə rusiyayönümlü olmasa da, onları ifrat sağçıların irəli sürdüyü "rəvayət" birləşdirir: "NATO Ukraynadakı müharibədə günahı bölüşür".
Lakin materialda vurğulanır ki, ən böyük təhlükə AfD olaraq qalır və partiyanın hər 3 bölgədə qələbə qazanacağı təqdirdə Almaniyadan çox-çox kənara çıxan siyasi zəlzələyə səbəb ola bilər.
Xatırladaq ki, regional seçkilərdən sonra qalib gələn partiyalar Bundestaq seçkilərində daha çox səs toplamaq və bütövlükdə Almaniya siyasətinə daha çox təsir etmək imkanı əldə edəcəklər.