Ümumdünya Səhiyyə Təşkilatı (ÜST) Afrika qitəsində yayılan meymun çiçəyi virusuna görə qlobal ictimai sağlamlıq üzrə fövqəladə vəziyyət elan edib.

Modern.az BBC-yə istinadən xəbər verir ki, Konqo Demokratik Respublikasında başlayan və sürətlə qonşu ölkələrə yayılan bu yoluxucu xəstəlik ən azı 524 nəfərin ölümünə səbəb olub.

Hazırkı epidemiyanın virusun yeni bir variantı ilə əlaqəli olduğu üçün əvvəlkilərdən daha çox narahatlıq doğurduğu bildirilir. Mütəxəssislər bunun indiyə qədər gördükləri ən təhlükəli variant olduğunu deyir və yayılma sürəti və yüksək ölüm nisbətindən narahatlıqlarını ifadə edirlər.

Qlobal ictimai sağlamlıq üzrə fövqəladə vəziyyət 196 ölkə üçün qanuni olaraq məcburi olan Beynəlxalq Səhiyyə Qaydalarına əsasən ən yüksək xəbərdarlıq səviyyəsidir. Ümumdünya Səhiyyə Təşkilatının direktoru Tedros Adhanom Ghebreyesus, Afrika qitəsində və ondan kənarda daha da yayılma ehtimalının "çox narahatedici" olduğunu söyləyib:

"Bu epidemiyanı dayandırmaq və insanların həyatını xilas etmək üçün əlaqələndirilmiş beynəlxalq reaksiya vacibdir".

Virus Mərkəzi və Şərqi Afrikada sürətlə yayılır. 2024-cü ilin əvvəlindən Konqo Demokratik Respublikasında 14,000-dən çox yoluxma hadisəsi qeydə alınıb. Bildirilir ki, fövqəladə qərar hökumətlərə cavab tədbirlərini koordinasiya etməyə və təsirlənmiş ərazilərə tibbi ləvazimat və yardım axınını sürətləndirməyə kömək edəcək.