Tacikistanın baş prokuroru Yusuf Rəhmon keçmiş xarici işlər naziri Hamroxon Zərifi, Ali Şuranın keçmiş sədri Əkbərşo İskəndərov, Demokratlar Partiyası sədrinin birinci müavini Əhmədşoh Komilzoda və Sosial Demokrat Partiyasının sədr müavini Şokircon Xamova qarşı cinayət işinin başlandığını təsdiqləyib.
Modern.az xəbər verir ki, bu barədə “Azadlıq” radiosunun (Radio Ozodi) Tacikistan xidməti məlumat yayıb.
Rəhmon bildirib ki, bu şəxslər parlamentin keçmiş deputatı və Demokratlar Partiyasının keçmiş sədri Səidcəfər Usmonzoda ilə “yaxın əlaqədə olublar”. O, 2024-cü ilin iyununda hakimiyyəti ələ keçirmək üçün müxalifət liderləri ilə sui-qəsddə, habelə Tacikistanda qadağan olunmuş Tacikistan Milli Alyansının liderləri ilə əməkdaşlıqda ittiham olunaraq saxlanılıb.
İstintaqın məlumatına görə, 2021-ci ilin sentyabrında Usmonzoda Tacikistan Milli Alyansının rəhbərinin müavini Şarofiddin Qadoyevlə telefon danışığı aparıb və “dövlət hakimiyyətinin qəsb edilməsi ilə bağlı ilkin tövsiyələr verib”. İddialara görə, Qadoyev İslam İntibah Partiyası ekstremist təşkilatının rəhbəri Muhiddin Kəbirinin ona maliyyə yardımı göstərəcəyini və “Camaat Ənsarullah” terror təşkilatının 3 mindən çox döyüşçünün xaricdən gətiriləcəyini təmin edəcəyini vəd edib.
“Dövlətə, millətə, prezidentə xəyanət edən şəxs hansı vəzifədə işləməsindən və əvvəllər hansı vəzifədə olmasından asılı olmayaraq qanun qarşısında cavab verəcək”, - deyə baş prokuror Yusuf Rəhmon bildirib.
O, saxlanılanlarla bağlı işin digər təfərrüatlarını açıqlamayıb.