Çinin paytaxtı Pekində Mahmud Abbasın rəhbərlik etdiyi Fələstin Azadlıq Təşkilatı (FAT) və HƏMAS arasında milli birlik hökumətinin qurulması üçün razılıq əldə edilib.
Modern.az xəbər verir ki, bu barədə məlumatı Çin Xarici İşlər Nazirliyi yayıb.
Pekin Bəyannaməsi Fələstinin 14 müxtəlif qrupu arasında iki gün davam edən danışıqlardan sonra imzalanıb. Müqaviləyə görə HƏMAS və FAT müharibənin sonunda Qəzzanı birgə idarə edəcək.
Çin Pekin Bəyannaməsini həyata keçirmək üçün müvafiq tərəflərlə əlaqə və koordinasiyanı gücləndirməyə hazır olduğunu qeyd edib.
İsrail birgə bəyanatı sərt tənqid edib. Ölkənin xarici işlər naziri İsrael Katz açıqlamada Mahmud Abbası hədəf alıb. "Mahmud Abbas terroru rədd etmək əvəzinə HƏMAS-ın təcavüzkarlarına və qatillərinə qucaq açaraq, əsl üzünü göstərdi”, - o bildirib.
Katz razılaşmanın həyata keçirilə bilməyəcəyini bildirib: "Çünki HƏMAS rəhbərliyi məhv ediləcək və Abbas bunu uzaqdan izləyəcək".
Qeyd edək ki, Çində əldə olunan razılaşmadan əvvəl oxşar təşəbbüslər Misir və digər ərəb ölkələri tərəfindən sınaqdan keçirilib. FƏTH və HƏMAS arasında 17 ildir davam edən güc bölgüsü probleminin nə dərəcədə həll olunduğu maraq doğurur.
HƏMAS-ın tanınmış simalarından olan Hussam Badran deyib ki, Pekin Bəyannaməsinin ən mühüm cəhəti razılaşdırılmış “Fələstin milli birlik hökuməti”dir. O, qurulacaq hökumətlə "müharibədən sonrakı Fələstinə regional və beynəlxalq müdaxilələrə qarşı güclü bir sədd çəkildiyini" bildirib.