İran İslam Respublikasında milliyətcə Azərbaycan türkü olan Məsud Pezeşkianın prezident seçilməsi Ermənistanda ciddi narahatlıqla qarşılanıb. Modern.az xəbər verir ki, Ermənistan mətbuatı erməni politoloqlar və siyasi şərhçilərin Məsud Pezeşkianın prezidentliyi dövründə İranın Cənubi Qafqaz regionuna yönəlik siyasətinin necə olacağına dair fikirlərinə geniş yer verir. Bu yazılarda Pezeşkianın milliyətinə - etnik azərbaycanlı olmasına da xüsusi diqqət çəkilir. Bəzi erməni ekspertlər isə Pezeçkianın Azərbaycan türkü olmasını təkzib etməklkə ermənilərə təsəlli verməyə çalışırlar. Məsələn, İrəvan Dövlət Universitetinin Şərqşünaslıq fakültəsinin İranşünaslıq şöbəsinin müdiri Vardan Voskanyan Facebook-dakı yazısında Azərbaycan mətbuatında İranın yeni prezidentinə geniş yer ayrılmasını qısqanclıqla qarşılayıb. O, Məsud Pezeşkianın azərbaycanlı olması barədə Azərbaycan mətbuatında dərc edilən məlumatların təxribat olduğunu vurğulayaraq, “Pezeşkian iranlıdır” deməklə ermənilərə təslli verməyə çalışıb. İran məsələləri üzrə siyasi ekspert Qarik Misakyan isə “Panorama.am”a gülünc bir açıqlama verib, bildirib ki, “Məsud Pezeşkian əslən Atrpatakananın (?) türkdilli hissəsindəndir, "amma orada yaşayanların hamısı iranlıdır. İranın ruhani lideri də bu bölgədəndir”, - o deyib.
Misakyan bildirib ki, "Məsud Pezeşkianın tərəfdarları arasında müxtəlif postlar tutmağa can atacaq pantürkist və Azərbaycanpərəst əhval-ruhiyyəli şəxslər də var, bu hal Ermənistanla münasibətlərə hansısa şəkildə təsir edə bilər". “Köklü dəyişikliklərin olacağını söyləmək hələ tezdir, lakin yəqin ki, yeni prezidentin seçilməsi ilə əlaqədar siyasi vektorda müəyyən dəyişikliklər mümkündür”, - deyə erməni ekspert bildirib. “Pezeşkianın İrandakı qələbəsindən çoxları narahatdır və bəlkə də əsassız deyil, onu azərbaycanlı hesab edirlər. Bundan əvvəl biz Baydenin mümkün məğlubiyyətindən narahat idik, əvvəllər Makronun məğlubiyyətindən əndişələnirdik, Lukaşenko çoxdan “azərbaycanpərəst”dir, Putin isə “Ərdoğanın müttəfiqidir”. Bəlkə də bütün bu narahatlıqlar məqsədəuyğundur, lakin biz bir neçə əsrdir ki, düzgün nəticəyə gəlməmişik”, - deyə Ermənistanın “Hraparak” qəzeti yazıb.
“Tehranda, Vaşinqtonda, Moskvada, Ankarada eyni vaxtda hakimiyyətə azərbaycanpərəst qüvvələr gəlirsə, Ermənistan öz maraqlarını savadlı qüvvələrin ağıllı siyasəti və səriştəli addımları ilə qoruya bilər. Bunun üçünsə həmin ölkələrdən müttəfiqlər qazanmaq lazımdır. Amma Ermənistanda indiki kimi fəlakətli hakimiyyət olsa, bizi itkilərdən, faciələrdən heç nə xilas edə bilməz, biz müttəfiqsiz həmişə "zəif və tək" olacağıq”, - deyə “Hraparak” qəzeti qeyd edib. A.Qorxmaz