Bakı. Trend:

Fransa Futbol Federasiyasının (FFF) prezidenti Filip Diallo Beynəlxalq Futbol Federasiyasının (FİFA) yeni prezidentinin seçkilərində iştirak etmək niyyətində olduğunu açıqlayıb. Bundan əvvəl təşkilat hazırkı prezident Canni İnfantinoya dəstəyini geri çəkib.

“Biz İcraiyyə Komitəsindəki həmkarlarımla hesab edirik ki, Canni İnfantinoya göstərilən etimad itirilib. Hazırda futbolun idarə olunması bizim təsəvvürlərimizə uyğun deyil. İnsanları birləşdirə biləcək legitim layihə vasitəsilə UEFA-da müzakirələrə töhfə vermək üçün bir sıra məsləhətləşmələrə başlamaq qərarına gəldik. Lazımi vaxtda növbəti seçkilərdə maraqlarımızı təmsil edəcək namizəd müəyyənləşdiriləcək”, - deyə Diallonun sözlərini Footmercato yayıb.

Federasiya alternativ fəaliyyət proqramı hazırlamaq üçün Fransadan və digər ölkələrdən idman idarəçiliyi sahəsində mütəxəssislərlə məsləhətləşmələr aparmağı planlaşdırır. FFF İnfantinonun yenidən seçilməsinə qarşı çıxacaq namizəd ətrafında tərəfdarları birləşdirmək niyyətindədir. Məsləhətləşmələrdə iştirak edəcək şəxslərdən biri də FİFA rəhbərini tənqid etdikdən sonra bu ilin yayında təşkilatdan işdən çıxarılan Kevin Lamurdur.

Dəstəyin geri çəkilməsi qərarı İnfantinonun 2026-cı ilin yayında irəli sürdüyü təşəbbüslə bağlıdır. O, FIFA Forward Enterprise adlı kommersiya strukturu yaratmağı və səhmlərin 20 faizədək hissəsini özəl investorlara satmağı təklif edib. Bu halda investorlar dünya çempionatlarının kommersiya hüquqlarına nəzarət əldə edəcəkdilər. Bu ideya UEFA, KONKAKAF, AFC və KONMEBOL tərəfindən rədd edilib. Kəskin tənqidlərdən sonra FİFA prezidenti bu layihədən imtina edib.

Təşkilat prezidentinin seçkiləri 18 mart 2027-ci ildə keçiriləcək.