Bakı.Trend:

Almaniya kansleri Fridrix Merts Xristian Demokrat İttifaqının (XDİ) Saksoniya-Anhalt federal torpağında keçirilən landtaq (regional parlament) seçkilərində məğlubiyyətə uğradığını etiraf edib.

“Bild” qəzetinin yazdığına görə, XDİ-nin federal rəhbərliyinin iclasında Merts Xristian Demokrat İttifaqının bu seçkilərdə “dramatik şəkildə məğlub olduğunu” bildirib. Onun sözlərinə görə, bu, “partiya üçün dərin dönüş nöqtəsi” deməkdir.

“Biz bunun öhdəsindən yalnız rəhbərlik daxilində problemlər barədə açıq danışacağımız təqdirdə gələ bilərik”, – deyə kansler bildirib.

O, həmçinin partiyanın birliyini qoruyub saxlamalı olduğuna əminliyini ifadə edib. Onun sözlərinə görə, hər kəs “partiyaya qarşı yönəlmiş ictimai bəyanatları ilə” XDİ-yə zərər vurduğunu dərk etməlidir. Mertsin sözlərinə görə, AfD-nin məqsədi “XDİ-ni tamamilə məhv etməkdir” və bu partiya ilə “heç bir əməkdaşlıq mümkün deyil”.

Merts əlavə edib ki, “Almaniya üçün Alternativ” (AfD) partiyasının qələbəsindən sonra ölkə “partiya sistemində tektonik dəyişikliklə” üzləşib. Buna görə də hakimiyyət mövcud gündəmlə daha davam edə bilməz.