Bakı. Trend:

Nepalda xilasedicilər ölkənin şimalında yerləşən tuneldən iki fəhləni sağ çıxarmağa nail olublar. Onlar avqustun 26-da baş verən fəlakətli daşqından sonra həmin tuneldə köməksiz vəziyyətdə qalmışdılar.

Bu barədə iki nazir məlumat verib.

“Bizə məlumat verildi ki, Trihuli-3 tunelindən bir nəfər indicə sağ-salamat çıxarılıb”, – energetika naziri Biraj Bakta Şresta əvvəlcə bildirib.

“İndi isə ikinci şəxsin də xilas edildiyini öyrəndik”, – onun həmkarı, daxili işlər naziri Sudan Qurunq bir qədər sonra əlavə edib.

Hindistan, Çin və Cənubi Koreyadan gəlmiş mütəxəssislərin də dəstəyi ilə onlarla nepallı xilasedici bir həftədir daşqından sonra torpaq altında qalmış bir neçə tuneldə fasiləsiz qazıntı işləri aparır. Bu tunellər bir neçə su elektrik stansiyası və tikilməkdə olan bənd ərazisində yerləşir.

Fəlakətdən qısa müddət sonra Nepal hakimiyyəti yalnız Trihuli-3 tunelində təxminən 100 fəhlənin içəridə qala biləcəyini bildirmişdi. Xilasedicilər cümə gününədək bölgədə su və palçıqla dolmuş tunellərdən yalnız bir neçə nəfərin cəsədini çıxara bilmişdilər. Onlar tunellərdə partlayıcılardan və ekskavatorlardan istifadə edərək çətinliklə irəliləyirdilər.

Nepal və Çin sərhədində yerləşən bölgədə bir neçə vadini dağıdan su, buz və dağıntı seli son rəsmi məlumatlara görə, azı 1 280 nəfərin ölümünə, 5 600-dən çox insanın isə itkin düşməsinə səbəb olub. İtkin düşənlər arasında Nepalın su elektrik stansiyalarında çalışan 900-dən çox işçi və fəhlə də var.

Energetika nazirinin sözlərinə görə, xilas edilən iki fəhlə Nepalın paytaxtı Katmanduya aparılacaq.