Bərdə. Trend:

Bərdədə baş vermiş yol-nəqliyyat hadisəsi nəticəsində xəsarət alan 3 nəfər (qadın) avqustun 27-də saat 16:10 radələrində Bərdə Rayon Mərkəzi Xəstəxanasının Təcili tibbi yardım şöbəsinə hospitalizasiya olunub.

Bu barədə Trend-in sorğusuna cavab olara Tibbi Ərazi Bölmələrini İdarəetmə Birliyindən (TƏBİB) məlumat verilib.

Bildirilib ki, müxtəlif bədən xəsarətləri alan pasiyentlərə zəruri tibbi xidmətlər göstərilib.

"Vəziyyəti qənaətbəxş qiymətləndirilən 1 nəfər ambulator müalicə üçün evə buraxılıb. Hazırda 2 nəfərin müalicəsi davam etdirilir, vəziyyətləri stabil qiymətləndirilir", - deyə məlumatda qeyd edilib.

18:12

xxx

Bərdə rayonunda yol-nəqliyyat hadisəsi baş verib.

Trend-in Qarabağ bürosunun əldə etdiyi məlumata görə, hadisə rayonun Alaçadırlı kəndində qeydə alınıb.

Hərəkətdə olan avtomobil idarəetmədən çıxaraq yol kənarında yerləşən yaşayış evinə çırpılıb. Qəza nəticəsində evin divarının bir hissəsi dağılıb.

Hadisə zamanı evdə olan 3 nəfər – İsmayılzadə Sevinc, İsmayılzadə Xədicə və İsmayılzadə Günel müxtəlif dərəcəli bədən xəsarətləri alıblar.

Yaralılar təcili tibbi yardım avtomobili ilə Bərdə Rayon Mərkəzi Xəstəxanasına çatdırılıblar.

Faktla bağlı araşdırma aparılır.