Milli Məclisin deputatı Fazil Mustafa Qəzənfər Musabəyovun adını daşıyan parkın adının dəyişdirilməsi təşəbbüsü ilə çıxış edib. O, parka Bakının bolşevik-daşnak qüvvələrindən azad edilməsində xüsusi rolu olan Nuru Paşanın adının verilməsi təşəbbüsü ilə çıxış edib. Deputat Azərbaycan Xalq Cümhuriyyətinə xəyanət etmiş, ömrünü bolşeviklərə xidmətə sərf edən şəxsin adına Bakıda park və küçənin olmasının ictimaiyyət arasında ciddi müzakirə və narazılıqlara səbəb olduğunu əlavə edib.

Modern.az Fazil Mustafanın təşəbbüsü ilə bağlı onun deputat həmkarı, həm də Qəzənfər Musabəyovun nəvəsi olan Rasim Musabəyovun fikrini öyrənib. Deputat artıq parkın babasının adını daşımadığını deyib və yalnız  xalq arasında bu adın qaldığını əlavə edib.

“Əvvəl o park Qəzənfər Musabəyovun adını daşıyırdı, lakin onun heykəli oradan götürüləndən sonra artıq rəsmi olaraq bu ad ona aid deyil. Əhali ənənəvi olaraq hələ də bu adı istifadə edə bilər, amma rəsmi olaraq park Qəzənfər Musabəyovun adını daşımır. Musabəyov qəsəbəsi də artıq mövcud deyil. Ona görə də Fazil Qəzənfər oğlu səbəbsiz yerə bu məsələni gündəmə gətirir. Əgər o, həmin parka Nuri Paşanın adının verilməsini istəyirsə, təşəbbüslə çıxış edə bilər, bu məsələ qanunla müzakirə oluna bilər”.

R.Musabəyov Qəzənfər Musabəyovun xalq düşməni və sırf kommunist funksioneri olmadığını deyib:

“O, Nəriman Nərimanovun silahdaşı olub, həkim kimi fəaliyyət göstərib. Nərimanovun rəhbərliyi ilə formalaşan ilk hökumətdə səhiyyə naziri olub, daha sonra həm hökumətə, həm parlamentə rəhbərlik edib. Zaqafqaziya Federasiyasının da rəhbəri olub. Cəmi 35 yaşında Azərbaycan hökumətinə rəhbərlik edib, 50 yaşında isə güllələnib.

Əgər onun xalq qarşısında hansısa günahları olubsa, hesab edirəm ki, həmin günahların bədəlini də çəkib. Odur ki, bu məsələni yenidən gündəmə gətirmək lazım deyil. Qəzənfər Musabəyov bu gün də doğulduğu Şabran (əvvəlki Dəvəçi) və Quba rayonlarında hörmətlə anılır. Onun ev-muzeyi də mövcuddur və insanlar ona rəğbətlə yanaşırlar”.