Dəmir orqanizmin əsas minerallarından biridir və qanın tərkibindəki hemoglobinin yaranmasında mühüm rol oynayır.

Metbuat.az xəbər verir ki, lakin bir çox insan bu maddənin çatışmazlığını uzun müddət hiss etmədən yaşayır. Həkimlərin sözlərinə görə, dəmir çatışmazlığı vaxtında müəyyən edilməzsə, anemiyaya (qanazlığına) və digər ciddi fəsadlara gətirib çıxara bilər.

Dəmir çatışmazlığının ən çox rast gəlinən əlaməti yorğunluqdur. Dəmir az olduqda bədən hüceyrələrinə kifayət qədər oksigen daşınmır, nəticədə insan özünü səbəbsiz yorğun, halsız və gücsüz hiss edir. Bəzən adi bir pilləkən qalxmaq belə nəfəs darlığı yaradırsa, bu da xəbərdarlıq əlaməti ola bilər. Qanda hemoglobinin azalması ürəyin daha çox işləməsinə səbəb olur və bu da ürək döyüntülərinin artması ilə müşahidə olunur.

Dəmir çatışmazlığı zamanı dırnaqlar kövrək olur, tez qırılır, saçlar isə seyrəkləşir və parıltısını itirir. Bu, bədənin dəmir ehtiyatını qorumaq üçün “ikinci dərəcəli” toxumalardan imtina etməsi ilə bağlıdır.

Hemoglobinin azalması səbəbindən dərinin rəngi açılır, üz solğun görünür. Xüsusilə dodaqlarda və göz qapaqlarının iç hissəsində bu fərq aydın hiss olunur. Bəzən isə beyin oksigen çatışmazlığına görə başgicəllənmə və diqqət dağınıqlığı yaranır.

Dəmir çatışmazlığı bəzi insanlarda buz, torpaq və ya nişasta kimi yeyilməyən maddələrə meyil yarada bilər. Bu hal “pika sindromu” adlanır və bədəndəki mineral balansının pozulmasından xəbər verir.

Mütəxəssislər bildirir ki, bu əlamətlərdən bir neçəsi sizdə varsa, qan analizi vermək lazımdır. Dəmir çatışmazlığının səbəbi bəzən sadəcə qidalanma ilə deyil, daxili xəstəliklərlə də bağlı ola bilər. Müalicə zamanı həkimlər dəmir tərkibli qidalar (qırmızı ət, qaraciyər, ispanaq, paxlalılar) və lazım gələrsə, əlavə preparatlar təyin edirlər