Qərb Ermənistanı son vaxtlar xüsusilə dəstəkləyir və onun güclənməsinə çalışır. ABŞ və Fransa başda olmaqla bir sıra dövlətlər Ermənistanı silahlandırır. Hər an vəziyyətin gərginləşməsi mümkündür.
Bu hal nə qədər davam edəcək? Ermənistan Qərbin dəstəyinə arxalanıb yeni təxribatlara əl ata bilərmi? Təxribatlara əl atılacağı təqdirdə, bu dəfə Ermənistana necə cavab veriləcək?
Məsələ ilə bağlı Modern.az-a danışan sabiq deputat Elşad Mirbəşiroğlu bildirib ki, Qərb Ermənistana açıq və hərtərəfli dəstək verməkdədir:
"Bunun hamısı Qərbin bizə məlum olan simasını bir daha ortaya qoyur. Ermənistan 30 ilə yaxın işğalçılıq siyasəti, Azərbaycana qarşı terrorçuluq fəaliyyəti həyata keçirib. ABŞ, Fransa və digər Qərb dairələri özlərinin dünyaya sırımağa çalışdıqları ideyalara sadiq olsaydılar, Ermənistana qarşı tamam fərqli mövqe sərgiləməliydilər. Ermənistanın işğalçılıq siyasəti, terrorçuluq fəaliyyəti ən sərt şəkildə qınanılmalıydı. Təəssüf ki, biz bunun əksini gördük. Qərb uzun illərdən bəri saxta mövqe sərgiləyib. Sadəcə olaraq, hər hansı dəyəri qalxan kimi istifadə edərək, özlərinin məkrli planlarını həyata keçiriblər".
E.Mirbəşiroğlu vurğulayıb ki, Ermənistan Azərbaycan dövlətinə və xalqına vurduğu ziyana görə məsuliyyətə cəlb olunmalıdır:
"Lakin biz bunun əksini görürük. Deməli, Qərbin özü öz dəyərlərinin düşmənidir. ABŞ, Fransa və onların təlimatı əsasında Hindistan Ermənistanı aktiv şəkildə çox təhlükəli hücum silahları ilə təmin edir. Bunu təbii ki, konkret məqsədlər üçün edirlər. Məqsəd də Cənubi Qafqaz regionunda Ermənistandan istifadə etməklə yenidən gərginlik və münaqişə ocağının yaradılmasıdır. Ermənistan Azərbaycanın Naxçıvan və Kəlbəcər istiqamətindəki mövqelərini atəşə tutduğu zaman orada Qərb kəşfiyyatının, ABŞ hərbçilərinin iştirakına da şahidlik etdik. Onlar yenidən regionda təxribat hazırlamağa çalışırlar. Regionu geniş döyüş meydanına çevirməyə çalışırlar".
Sabiq deputat qeyd edib ki, Ermənistandan istifadənin əsas hədəflərindən biri də ABŞ-nin əsas geosiyasi rəqibi olan Rusiyaya qarşı cəbhənin açılmasıdır:
"Bunun da əziyyətini bütün region dövlətləri və xalqları çəkə bilər. Ona görə də bu məsələdə region dövlətlərinin hamısının imkanları səfərbər olmalıdır ki, istənilən təxribatların qarşısı qətiyyətlə alınsın. ABŞ-nin Ermənistan üzərindən region üçün məkrli, olduqca təhlükəli planlarının həyata keçirilməsi imkanları ümumiyyətlə olmamalıdır. Hər vasitə ilə Ermənistan üzərindən təxribatlar törədiləcək. Azərbaycanın hazırki güc reallığı çərçivəsində Ermənistan olduqca böyük risklər qarşısında qoyulur. Çünki Ermənistan Azərbaycanla mübarizə aparacaq gücdə deyil. Sözsüz ki, biz BMT nizamnaməsinin 51-ci maddəsinə istinad edərək Ermənistan tərəfindən hər hansısa təhlükə yarandığı zaman gücdən istifadə edəcəyik. Bu halda Ermənistanın aqibətinin acınacaqlı olacağı heç kimdə şübhə doğurmur".