Britaniyada fəaliyyət göstərən GB News xəbər kanalında Vətən müharibəsindən sonra Azərbaycana qarşı beynəlxalq mediada istifadə olunan ənənəvi ittihamlardan ibarət məqalə dərc edilib. Məqalədə Britaniyanın dövlət katibi David Lamminin Azərbaycanın öz torpaqlarını azad etməsinə dair fikirlərinin diplomatik skandala səbəb olduğu iddia edilərək Ermənistan tərəfinin buna görə Britaniya XİN-indən açıqlama gözlədiyi qeyd olunub.
Modern.az xəbər verir ki, bu xüsusda GB News-a müsahibə verən Azərbaycanın Britaniyadakı səfiri Elin Süleymanov Qarabağın Azərbaycan torpağı olması faktının, bütün dünya ictimaiyyəti, eləcə də Ermənistanın Baş naziri Nikol Paşinyan tərəfindən də təsdiqləndiyini deyib. O, bildirib ki, BMT TŞ-nin mövcud qətnamələri də işğal faktını və Qarabağın Azərbaycanın ayrılmaz hissəsi olduğunu təsdiqləyirdi.
Azərbaycanın 30 ildən artıq müddətdə üzləşdiyi işğal, etnik təmizləmə və mina probleminə diqqət çəkən səfir Süleymanov post-Sovet məkanında baş verən separatçı münaqişələrin köklərinin bənzər olmasına baxmayaraq ərazi bütövlüyünə hörmət yanaşmasında ikili standart tətbiq edilməsini tənqid edib. Diplomat Britaniyanın kölgə Avropa naziri Alicia Körnsün mövzuyla bağlı paylaşımlarında iddia etdiyinin əksinə olaraq Britaniyanın mövqeyinin hər zaman Azərbaycanın ərazi bütövlüyünə hörmət əsasında qurulduğunu vurğulayıb.
GB News jurnalistinin “Ermənistanın Britaniyadakı səfirinin nəyə görə “Azərbaycanın torpaqlarını azad etməsi” ifadəsindən narahat olduğuna dair sualına cavab olaraq isə səfir Süleymanov belə cavab verib: “Nəyə görə Ermənistan səfiri Britaniyalı nazirin Azərbaycan torpağı haqqında danışmasından narahatdır? Əslində bu özü-özlüyündə bəzi məsələlərə aydınlıq gətirir.”
Müsahibəsində səfir Qarabağın erməni əhalisi ilə bağlı irəli sürülən iddialara da aydınlıq gətirib.