Türkiyənin xarici işlər naziri Hakan Fidan beynəlxalq münasibətlərdəki aktual gündəm məsələləri ilə bağlı bir sıra fikirlər səsləndirib.
Modern.az xəbər verir ki, nazir "Anadolu" agentliyinin "Redaktor masası" verilişinin qonağı olub.
O, Türkiyədə kibertəhlükəsizlik sahəsindən məsul olan ayrıca dövlət qurumunun yaradılacağını açıqlayıb: “Ayrılıqda kibertəhlükəsizlik təşkilatının yaradılması hökumətimizin gündəminə gətirilib. Prezidentimiz qərar verdi ki, bu indi baş verməlidir”.
Hakan Fidan Suriya məsələsinə də toxunub: “İnanıram ki, Türkiyənin istədiyi həll yolu reallaşarsa, Suriya digər problemləri daha asan həll edə bilər”.
Avropa ölkələrində ifrat sağçı qüvvələrin hakimiyyətə gələcəyi təqdirdə bunun Türkiyə ilə münasibətlərə necə təsir edəcəyindən danışan Fidan bildirib: “Avropa ölkələri Türkiyə ilə münasibətlərində sanki ifrat sağçılar hakimiyyətdəymiş kimi davranıblar. Ona görə də ifrat sağçılar hakimiyyətə gəlsə, bizim üçün heç nə dəyişməyəcək”.
Türkiyənin BRICS üzvlüyü üçün müraciəti də gündəmdə olan məsələlərdən biri kimi XİN başçısı tərəfindən reaksiyasız qoyulmayıb: “Avrop İttifaqı ilə iqtisadi inteqrasiyamız üzvlüklə taclansaydı, bəlkə də bir çox məsələlərdə bu qədər axtarışda olmazdıq”.
Nazir Qərb və Rusiya arasındakı soyuq müharibəyə də münasibət bildirib: "Qərb və Rusiyanın ağırlıq mərkəzində qurduğu ittifaqlarla soyuq müharibə daha da dərinləşəcək və başqa bir ölçüyə doğru inkişaf etməyə davam edəcək".