Sentyabrın 16-da İmişli rayonu Aranlı kənd 1 nömrəli tam orta məktəbinin ibtidai sinif müəllimi Leyla Nəcəfquluyeva ilə icra nümayəndəsi arasında mübahisə yaranıb. Bununla bağlı sosial şəbəkələrdə video paylaşılıb.
Məktəbəqədər və Ümumi Təhsil üzrə Dövlət Agentliyinin yaydığı məlumatda bildirilib ki, Leyla Nəcəfquliyeva 16 sentyabr 2024-cü il tarixində saat 08:00 radələrində sinif rəhbəri olduğu IIIb sinif şagirdlərinin bir qismini təhsildən yayındırıb.
Leyla Nəcəfquliyevanın həmin gün məktəbin həyətinin giriş qapısı qarşısında şagirdləri yerdə əyləşdirərək dərs keçməsi onun şəxsi mənafeyi naminə şagirdlərdən alət kimi istifadə etməsi kimi qiymətləndirlib. Onun “Təhsilverənlərin etik davranış Qaydaları”nı kobud şəkildə pozduğu da vurğulanıb. Buna görə də müəllimlə bağlınmış əmək müqaviləsinə 17 sentyabr 2024-cü il tarixdə xitam verilib.
Modern.az insidentdə iştirak edən İmişli rayon icra hakiminin Aranlı kənd nümayəndəsi Əlhümbət Alıkişiyevlə əlaqə saxlayıb.
O bildirib ki, sentyabrın 16-sı səhər saatlarında məktəbin gözətçisi zəng edərək Leyla Nəcəfquliyevanın uşaqları məktəbin önünə yığıb dərs keçməyə başladığını deyib:
“O gecədən valideynlərə zəng edib ki, uşaqlarınızı sabah məktəbə göndərin, əgər bunu etməsəniz, guya, məktəb açılmayacaq. Mən də xəbər tutan kimi məktəbə gəlib bunun düzgün olmadığını bildirdim. Qeyd etdim ki, bizim məktəbin açılması sabah üçün (sentyabrın 17-də - red.) nəzərdə tutulub. Uşaqların valideynlərini çağırdım, bəziləri uşaqlarını apardı, qalanını isə sanki müəllim əsir götürmüşdü. Bundan sonra mən oradan uzaqlaşdım”.
İcra nümayəndəsi bildirib ki, qeyd edilən müəllim əvvəlcədən video çəkmək üçün plan qurub:
“Onun qızı 7-8-ci sinifdə oxuyur. Orta məktəb şagirdi necə cəsarət edə bilər ki, icra nümayəndəsini lentə alsın?! Mən ona dedim ki, dövlətimiz məktəb binasına xərc çəkib, sabah da açılış olacaq. Sən hansı haqla bu uşaqları bura yığıb təxribat yaradırsan?! Mənə deyir məktəb tikdirəcəyəm. Sən kimsən ki, məktəb tikdirəsən? Mənim icra nümayəndəsi olmağım bir yana, mən onun atası ilə yaşıdam. Gələndə ayağa qalxmaq nəzakətini belə göstərmədi".
Əlhümbət Alıkişiyevin sözlərinə görə, həmin kənddə 2 məktəb var: "Digəri 6-7 il əvvəl tikilib təhvil verildi. Bizim məktəb isə 1960-cı illərdən tikilən məktəb idi. Döşəməsi, şəraiti pis vəziyyətdə idi. Əvvəldən də deyilirdi ki, burada məktəb tikiləcək. Məktəbin tikintisi başlanan zaman da Leyla müəllim ortaya düşdü ki, bu məktəbdə sanitar qovşaq yoxdur. 4 sanitar qovşaq vardı, ancaq müəllim olmadığını iddia edirdi. Həmin məktəbdə 500-ə yaxın şagird oxuyur. Mən düşünürəm ki, o vəzifəyə gəlmək üçün bunları edir. Tez-tez dilə gətirir ki, məktəbi mən direktordan daha yaxşı idarə edərəm. Əgər bacarırsansa, get imtahan ver, direktor ol. Bu gün dövlətimizdə hər şey üçün şərait yaradılıb. İstənilən şəxs biliyinə, bacarığına güvənirsə layiq olduğu vəzifəni əldə edir”.
Ə.Alıkişiyev qeyd edib ki, Leyla Nəcəfquliyevanın əsli Füzulidəndir: “Oradan qaçqın düşüb Arxangelskə gediblər. Sonra Bakıya qayıdıb təhsilini bitirdikdən sonra təyinatla bizim kəndə gəldi. Onun qaynatası 31 il məktəb direktoru və seçki məntəqəsinin sədri olub. Sonuncu seçkilərdə də Leyla müəllimə deputatlığa namizəd olmuşdu. Səs toplaya bilmədi və seçilmədi. O kimə arxayındır, bilmirəm, Allah axırını xeyir eləsin”.