Yaşıl Teatrda bəstəkar İmruzə Hüseynovanın "Mübarəkdir Zəfərim" adlı yaradıcılıq gecəsi keçirilib.
Modern.az xəbər ki, bəstəkar İmruzə Hüseynovanın "Mübarəkdir Zəfərim" adlı möhtəşəm yaradıcılıq axşamı unikal mahnı ilə açılıb və tamaşaçılara böyük Zəfərə həsr olunmuş ilhamverici kliplər təqdim olunub.
Bu möhtəşəm axşamda Azərbaycan səhnəsinin tanınmış sənətçiləri öz parlaq çıxışları ilə tamaşaçılara unudulmaz anlar yaşadıb. İlk olaraq, Təranə Vəlizadə öz sehrli səsi ilə konsertə rəng qatıb.
Daha sonra digər məşhur ifaçıların çıxışları ilə davam edib.
Konsert öncəsi İmruzə Hüseynova əməkdaşlarımızın suallarını cavablayıb:
"Konsertimi mübarək zəfərimə həsr etmişəm, Konsertin də adı elə mənim "Mübarəkdir Zəfərim" adlı musiqimdən götürülüb. İnanıram ki, bu konsertimiz, mahnım qəlblərə toxunacaq. Bu gecəni fərqləndirən əsas cəhətlərdən biri də ifaçıların hər birinin sanballı olmasıdır".
Bəstəkar baş tutan 5-ci konsertinin artıq son yaradıcıllıq gecəsi olduğunu qeyd edib.
Gecənin tanınmış qonaqları kameramız önünə keçərək İmruzə Hüseynovanın bənzərsiz yaradıcıllığından söz açdılar.
Xalq artisti Flora Kərimova musiqilərini sevərək ifa etdiyi İmruzə Hüseynovanın gecəsinə böyük həyəcanla gəldiyini bildirdi:
"İmruzə xanım dəyərli bəstəkar, eyni zamanda gözəl insandır. Bu əlamətdar günündə ona cansağlığı, daha da yaradıcı günlər arzulayıram". - deyə Xalq artisti bildirdi.
Tanınmış ifaçı Abbas Bağırov da qonaqlar sırasında idi:
"Bu gecəyə İmruzə xanımın dəyərli 2 bəstəsi ilə gəlmişəm. Mənə əziz olan İmruzə xanımı təbrik edirəm. Bizim tanışlığımız, ifa edəcəyim mahnıların tarixçəsi 20 il əvvələ dayanır".
Xalq artisti İlqar Muradov da təbriklərə qoşulub:
"İmruzə xanımla bizim əməkdaşlığımız uzun illərdir var. "Mənim günahım" musiqisi ilə çıxış edəcəm. İmruzə xanıma uğurlar arzu edirəm".
Tanınmış aktyor, Xalq artisti Həmidə Ömərova bu gecəyə sevərək gəldiyini, konsertin möhtəşəm keçəcəyinə əmin olduğunu bildirdi:
"İmruzə xanım adı kimi nadir şəxsiyyətdir. İncə, gözəl, sənətkar xanımdır. O, insanlara o qədər qəlbən sevgi ilə bağlıdır ki, insanlar İmruzə xanımdan ayrılmaq istəmirlər. Zalın da dolu olması buna bir sübutdur".
Yaradıcıllıq gecəsi yerli sənətkarların İmruzə Hüseynovanın bəstələrinin ifası ilə davam edib.