Dünən Livanda Hizbullah nümayəndələrinin istifadə etdiyi rabitə vasitəsinin - peycerlərin silsilə partlayışı və 4 mindən çox insanın yaralanması bu tipli qruplaşmaların rabitə məsələsində gizlilik və etibarlılıqla yanaşı, həm də təhlükəsizlik komponentinin vacibliyinə diqqət ayırmasını gündəmə gətirib. Hizbullah bu məsələdə İsraili günahlandırsa da, Təl-Əvivdən bunu təsdiqləyəcək heç bir rəsmi açıqlama gəlməyib. Maraqlıdır, Hizbullahla yanaşı, İsrailin aylardır, müharibə apardığı HƏMAS-ın hazırkı lideri Yəhya Sinvar necə qorunur və sağ qalmağı bacarır?
Modern.az dünya mətbuatının səhifələrində bu suala cavab tapmağa çalışıb.
Məsələn, "The Wall Street Journal"ın məlumatına görə, o, kəşfiyyat şəbəkəsindən yayınmaq üçün həbsdə olduğu günlərdə hazırladığı aşağı texnologiyalı rabitə sistemindən istifadə edir.
Nəşr yazır ki, mürəkkəb kuryerlər, parollar və əlyazma qeydləri sistemi Sinvara hətta yeraltı tunellərdə gizlənərkən də HƏMAS əməliyyatlarını idarə etməyə imkan verir. Sinvar uzun illər İsrailin hədəfində olmasına baxmayaraq, indiyə qədər sağ qalmağı bacarıb. Onun uğurunun arxasında həbsxanada olduğu günlərdə inkişaf etdirdiyi aşağı texnologiyalı rabitə sistemi dayanır.
WSJ-nin atəşkəs danışıqlarında iştirak edən vasitəçilərin sözlərinə əsasən yazdığına görə, Sinvar İsrail tərəfindən izlənilə bilən telefon zəngləri və elektron rabitələrdən uzaqdır. Bunun əvəzinə kuryerlər mürəkkəb parollar və əlyazma qeydləri sistemindən istifadə edirlər. Şifrələnmiş mesajlar və etibarlı kuryerlər əsas elementlər kimi çıxış edir.
Belə ki, Sinvardan gələn tipik bir mesaj əl ilə yazılır və etibarlı HƏMAS üzvünə ötürülür. Bu mesaj daha sonra kuryer zənciri ilə ötürülməyə davam edir. Mesajlar tez-tez şifrələnir və müxtəlif alıcılar, vəziyyətlər və vaxtlar üçün müxtəlif şifrələr istifadə olunur. Bu sistem Sinvar və digər məhbusların İsrail həbsxanalarında ikən inkişaf etdirdiyi metodun təkamülüdür.
Məlumata görə, İsrail HƏMAS-ın yüksək səviyyəli rəsmilərini öldürməyə müvəffəq olduqdan sonra Sinvar ünsiyyət üsullarını daha da sərtləşdirib. Xüsusilə HƏMAS-ın siyasi liderinin müavini Saleh əl-Arurinin Beyrutda öldürülməsindən sonra Sinvar demək olar ki, tamamilə əlyazma qeydlərinə və şifahi ünsiyyətə keçib.
Nəşr vurğulayır ki, İsrail ordusu 7 oktyabr hücumunun memarı kimi gördüyü Sinvarı tapmaq üçün səylər göstərir. Sinvarın öldürülməsi və ya ələ keçirilməsi İsrail üçün böyük qələbə anlamına gəlir. Əslində Sinvarın ələ keçirilməsi 11 aydır davam edən müharibəni də sona yaxınlaşdıra bilər. Lakin Qəzza zolağının hərbi nəzarət altında olmasına baxmayaraq, İsrail kəşfiyyatı hələ də Sinvarı tapa bilməyib.
İsrail hərbi kəşfiyyatı elektron kommunikasiyaların aşkarlanmasında dünyanın ən qabaqcıl imkanlarına malikdir. Qabaqcıl kəşfiyyat imkanlarına baxmayaraq Sinvarın köhnə üsulları bu kəşfiyyat şəbəkəsindən yayınmağa hələlik kömək edir.
İsrail hərbi kəşfiyyatının keçmiş rəsmisi Maykl Milşteyn bildirib ki, İsrail ordusunun onu tapa bilməməsinin əsas səbəblərindən biri budur: "O, həqiqətən bütün əsas şəxsi ünsiyyət nümunələrini çox möhkəm saxlayır".
Materialda o da qeyd olunub ki, Sinvarın ehtiyatlı yanaşması müharibəni bitirmək üçün danışıqları arabir ləngidir. Kritik anlarda Sinvara çatmaq olmur. Bəzən isə mesajları demək olar ki, real vaxt rejimində ötürür. Rabitə gecikmələrinin danışıqlar taktikası, yoxsa Sinvarın sərt protokollarının nəticəsi olduğu aydın deyil.
HƏMAS lideri indiyədək İsrail kəşfiyyatından yayınmağı bacarıb. Bununla belə, ekspertlər Sinvarın tək bir səhvinin İsrail üçün fürsət pəncərəsi aça biləcəyi ilə razılaşırlar. Elektron müharibə üzrə ekspert Tomas Vitinqtonun sözlərinə görə, intizamın unudulduğu bir saniyə onun "ölüm fərmanını imzalaya bilər”.
Modern Təhlil və Araşdırma Qrupu