Gənclər və yaşlı nəsil arasında müşahidə olunan "soyuqluq" dövrümüzün aktual sosial problemlərindən biridir. Bu nəsillərarası problem müxtəlif mədəni, iqtisadi və texnoloji dəyişikliklərdən qaynaqlanır və fərqli baxış bucaqlarını, prioritetləri və həyat tərzlərini əks etdirir.
"Pew Research Center" tərəfindən aparılan bir araşdırmaya görə, gənclərin 65%-i yaşlı nəslin yeni texnologiyalarla əlaqəli dəyişiklikləri başa düşmədiyini düşünür. "Eurostat" məlumatlarına görə isə, Avropa İttifaqı ölkələrində nəsillərarası gərginlik sosial məsələlərin siyahısında önəmli yerlərdən birini tutur.
Mövzu ilə bağlı Modern.az-a danışan sosioloq Əhməd Qəşəmoğlu bildirib ki, dünyada uğurla yayılan bir nəzəriyyə var. Yaponiya, Amerika Birləşmiş Ştatları da daxil olmaqla sürətlə yayılan bu nəzəriyyə ahəngyol adlanır:
“Bu elm əsaslandırır ki, hər davranışın foramlaşmasında 4 amil mühüm təsir edir
İnsanın şəxsi, mənəvi potensialı Düşdüyü mühit Aldığı informasiyalar Üstünlük verdiyi dəyərləriBu dəyərlər hər zaman insanların davranışlarını formalaşdırıb. Azərbaycan gəncləri 30-40 il əvvəlki millətin nümayəndələridir. Yəni birinci faktorda dəyişiklik yoxdur”.
Onun sözlərinə görə, bu problemin səbəbi digər 3 faktorda axtarılmalıdır:
“Gənclərimiz daha çox sosial şəbəkələrdən, internetdən, beynəlxalq səviyyədə yayılan bəzi proqramlardan informasiya alırlar. Azərbaycanda siyasi marağı olan ölkələr çalışır ki, qədim milli-mənəvi mahiyyəti olan dəyərlərimiz elə qalmasın. Məsələn əvvəllər gənclər ağsaqqallara çox böyük hörmət bəsləyib. Bu mövzuda bəzən gənclərlə söhbət də edirəm. Ən primitiv mövzu olan ictimai nəqliyyatda yer vermək mövzusunda belə gənclər özləri də bilmədən elə şeylər aşılayır ki, bizim milli adət-ənənələrimizə uyğun deyil. Xarici informasiya mənbələri bu istiqamətdə böyük rol oynayır. Bizim tənqid etdiyimiz sovet rejimində bu məsələ ilə bağlı çalışırdılar”.
Müsahibimiz sonda qeyd edib ki, gənclər əvvəllər milli dəyərlərə üstünlük verirdilər:
"Nizamidən tutmuş bütün ədəbiyyatımızda, nağıllarımızda həmişə milli dəyərlərimiz aşılanıb. İndi gənclərimiz o istiqamətdə məlumat almır, heç bədii ədəbiyyat da oxumur. Bu problemin səbəbi 4 amilin verdiyi yekun nəticədir. Biz bu işi düzəldə bilərik, düzəltməliyik. Çünki xalqın milli-mənəvi keyfiyyəti onun taleyində mühüm rol oynayır. Ona görə də bu məsələləri başlı-başına buraxmamalıyıq. Bu məsələdə dövlət qurumlarının üzərinə xeyli məsuliyyət düşür. Təəssüf ki, bu işlər arzuolunan səviyyədə aparılmır”.