Cənubi Koreya hərbçiləri müxtəlif hərbi obyektlərdə, o cümlədən Şimali Koreya sərhədi yaxınlığındakı bazalarda quraşdırılmış 1300-dən çox müşahidə kamerasını Çin istehsalı olduğu aşkar edildikdən sonra yığışdırıb.
Modern.az xəbər verir ki, bu barədə "Yonhap" məlumat yayıb.
Adı açıqlanmayan hərbçi bildirib ki, iyulun sonunda hərbi və kəşfiyyat rəsmiləri tərəfindən aparılan araşdırmalarda Cənubi Koreya şirkətindən tədarük edilən müşahidə kameralarının Çin istehsalı olduğu müəyyən edilib.
"Məlum oldu ki, kameralar Çin serverinə qoşulmaq və qeydə alınmış görüntüləri xaricdən ötürmək üçün nəzərdə tutulub, lakin heç bir məlumat sızmayıb", - rəsmi bildirib.
Təhlükəsizlik səbəbilə Çin istehsalı olan 1300-dən çox müşahidə kamerasının yığışdırıldığı barədə məlumatı paylaşan səlahiyyətli onların yerli istehsal olan avadanlıqlarla əvəz edildiyini vurğulayıb.
Təhlükəsizlik kameralarının Şimali Koreya sərhədini izləmək üçün deyil, hərbi təlim zonaları və baza çəpərləri üçün istifadə edildiyinə diqqət çəkən hərbçi tədarükçünün avadanlıqların mənşə ölkəsini gizlətməkdə şübhəli olduğunu və ordunun qanuni şəkildə bu şirkətə qarşı tədbir görəcəyini bəyan edib.