Azərbaycan məktəblərinin bir çoxu Facebook hesabına malik olsa da, sosial şəbəkədən kənarda qalan təhsil ocaqları da az deyil. Müasir zamanda təhsildə kommunikasiya önəmli sayılır. Facebook hesabı olmayan məktəblərə bununla bağlı hansısa təlimat verilibmi?
Elm və Təhsil Nazirliyindən Modern.az-a bildirilib ki, elm və təhsil sahəsi ilə bağlı həyata keçirilən proseslərin məqsədi və məzmunu media subyektləri və digər üsullarla əhaliyə, təhsil müəssisələrinin pedaqoji heyətinə və digər hədəf qruplarına çatdırılır:
“Ümumi təhsil müəssisələri də qəbul edilən qərarların, verilmiş tapşırıqların, təhsilə aid müxtəlif məsələlərlə bağlı qəbul edilmiş strategiyaların icrası və hesabatlılığının təmini məqsədilə sosial media alətlərindən istifadə edə bilər. Sosial media hesablarından istifadə etməyən ümumtəhsil müəssisələri sözügedən məlumatları regional Təhsil idarələrinin rəsmi sosial media səhifələri vasitəsilə həyata keçirirlər. Qeyd etməliyik ki, ümumi təhsil müəssisələrinin sosial media hesablarından istifadə qaydaları qanunlar və müvafiq icra hakimiyyəti orqanının əmrləri ilə müəyyənləşir. Bu barədə aidiyyəti üzrə ümumi təhsil müəssisələrinə təlimatlar göndərilib”.
Təhsil eksperti Elnur Aydının sözlərinə görə, məktəbin Facebook hesabının üstünlüklərindən biri sosial şəbəkə hesabından kommunikasiya vasitəsi kimi istifadə edilməsidir:
“Facebook və digər sosial media platformaları məktəblər, müəllimlər, valideynlər və şagirdlər arasında effektiv ünsiyyətin qurulmasına kömək edə bilər. Məktəbin rəsmi səhifəsində məlumatlar sürətlə paylaşıla bilir. Tədbirlərdən paylaşımlar və müzakirələr üçün də sosial media vasitələri əlverişli platformadır”.
Ekspert qeyd edir ki, təhsildə kommunikasiya çox önəmlidir:
“Müəllimlər və şagirdlər arasında sağlam və açıq kommunikasiya müvəffəqiyyətli tədris prosesinin əsasını təşkil edir. Bu, eyni zamanda valideynlər və müəllimlər arasında da əlaqəni gücləndirir, uşaqların tədris prosesindəki inkişafını izləməyə və dəstək olmağa kömək edir. Məktəbin rəsmi Facebook səhifəsində paylaşılan kontent (məzmun) press-reliz formatının tələblərinə uyğun olsa, düzgün formatda paylaşılan fotolar olsa, düzgün həştəqlərdən istifadə olunmasına diqqət yetirilsə, yaxşı olar. Nəzərə alsaq ki, hər bir məktəbin rəsmi Facebook səhifəsi həmin məktəbin sosial şəbəkədə simasıdır”. Gülarə Quliyeva