Azərbaycan Prezidenti İlham Əliyev Fransanın Paris şəhərində keçirilmiş XVII Yay Paralimpiya Oyunlarında uğur qazanan idmançıları və onların məşqçiləri üçün yüksək nəticələrə görə mükafatların müəyyən edilməsi haqqında sərəncam imzalayıb.
Sərəncama əsasən, XVII Yay Paralimpiya Oyunlarında əldə etdikləri yüksək nəticələrə görə Azərbaycan Respublikasının idmançıları və onların məşqçiləri üçün mükafatların məbləği aşağıdakı qaydada müəyyən edilib:
- 1-ci yeri tutan hər bir idmançıya 200 000 (iki yüz min) manat, onun məşqçisinə 100 000 (yüz min) manat; - 2-ci yeri tutan hər bir idmançıya 100 000 (yüz min) manat, onun məşqçisinə 50 000 (əlli min) manat; - 3-cü yeri tutan hər bir idmançıya 50 000 (əlli min) manat, onun məşqçisinə 25 000 (iyirmi beş min) manat. Xatırladaq ki, Azərbaycan Fransanın Paris şəhərində keçirilən XVII Yay Paralimpiya Oyunlarında 7 idman növü üzrə 18 idmançı ilə iştirak edib və yarışı 28-ci pillədə başa vurub. Azərbaycan milli komandası 4 qızıl, 2 gümüş və 5 bürünc medal qazanıb.
Komandamızın heyətində İmaməddin Xəlilov (parataekvondo, 70 kq), Səid Nəcəfzadə (T12 kateqoriyası, uzunluğa tullanma), Orxan Aslanov (T13 kateqoriyası, uzunluğa tullanma), Lamiyə Vəliyeva (100 metr məsafəyə qaçış) Paralimpiya çempionu olaraq, qızıl medala layiq görülüblər.
Raman Saley (100 metr məsafəyə arxasıüstə üzmək), Lamiyə Vəliyeva (400 metr məsafəyə qaçış) gümüş medal qazanıblar.
Sabir Zeynalov (parataekvondo, 58 kq), Vəli İsrafilov (100 metr məsafəyə brass üsulu ilə üzmək), İlham Zəkiyev (paracüdo, +90 kq), Raman Saley (100 metr məsafəyə sərbəst və "butterfly" üsulla üzmək) bürünc medala sahibləniblər. Beləliklə, Paralimpiya Oyunlarında iki idmançımız - Lamiyə Vəliyeva və Raman Saleyin hərəsi bir neçə medal qazanıb. Ləman Vəliyeva bir qızıl, bir gümüş, Raman Saley bir gümüş və 2 bürünc əyyarlı medala yiyələnib. Maraqlıdır, bir neçə medal qazanmış paralimpiyaçılar necə mükafatlandırılacaq? Onlar pul mükafatını bir medala, yoxsa bir neçə medala görə alacaqlar? Modern.az saytı bu sualla Milli Paralimpiya Komitəsinə müraciət edib. Milli Paralimpiya Komitəsindən sorğumuza cavab olaraq bildirildi ki, mükafat yarışlarda qazanılan medallara görə veriləcək. Yəni idmançıya hər bir medala görə ayrıca pul mükafatı təqdim olunacaq. Bu isə o deməkdir ki, Ləman Vəliyeva bir qızıl və bir gümüş, Raman Saley bir gümüş və 2 bürünc medala görə ayrı-ayrılıqda pul mükafatları alacaqlar. Gülarə Quliyeva