İran həmişə regionda sülh və təhlükəsizliyin tərəfdarı olub. Modern.az xəbər verir ki, bunu “İrəvan dialoqu” beynəlxalq forumunda İran İslam Respublikasının xarici işlər nazirinin müavini Məhəmməd Həsən Şeyxülislami deyib.
Onun sözlərinə görə, Cənubi Qafqazda sülh və sabitliyin bərqərar olması kontekstində Tehran Ermənistan və Azərbaycan arasında sülhün əldə edilməsinə yönəlmiş danışıqları alqışlayır və sülh sazişinin imzalanması prosesinin sürətləndirilməsinin vacibliyini vurğulayır.
“Biz qonşularımıza mümkün qədər tez bir zamanda mübahisələrin həllinə kömək etməyə hazırıq, biz güclü və vahid regionun yaradılmasını dəstəkləyirik”, - deyə iranlı diplomat bildirib.
Nazir müavini regional kommunikasiyaların açılmasının vacibliyini qeyd edərək, bunun region dövlətlərinin ərazi bütövlüyü və suverenliyi daxilində olmasına tərəfdar çıxdıqlarını vurğulayıb.
“Biz əminik ki, Cənubi Qafqaz xarici qüvvələrin rəqabət meydanına çevrilməyəcək”, - o deyib.
Məhəmməd Həsən Şeyxülislami həmçinin vurğulayıb ki, İran Ermənistan hökumətinin təklif etdiyi “sülh kəsişməsi” layihəsinin əsasında dayanan prinsipləri, yəni ərazi bütövlüyü, suverenlik, qarşılıqlı etimad prinsiplərini dəstəkləyir.