Türkiyənin Trabzon şəhərində Özbəkistanın fəxri konsulluğu açılıb.
Modern.az xəbər verir ki, bu barədə Özbəkistanın Türkiyədəki səfirliyinin mətbuat xidməti məlumat yayıb.
“Yeni fəxri konsulluğumuz müvafiq sahədə vətəndaşlarımızın hüquqi və qanuni mənafelərinin qorunmasına kömək edəcək, Trabzon ilə ölkəmizin bölgələri arasında ticarət-iqtisadi, mədəni-humanitar əməkdaşlığı yeni səviyyəyə qaldıracaq”, - deyə məlumatda bildirilir.
Konsulluq Trabzon regional idarə binasının yaxınlığında yerləşəcək. Bundan əvvəl Bursa, Adana və Antalyada fəxri konsulluqlar açılıb.
Fəxri konsulluğun açılışı ilə əlaqədar qəbul da təşkil olunub. Qonaqlara Özbəkistanda son illər aparılan islahatlarla bağlı təqdimat keçirilib. Bundan əlavə, ticarət-iqtisadi və turizm sahələrində əməkdaşlıq imkanları müzakirə edilib.