Azərbaycanda yaşayan, oxuyan hər bir şagird Azərbaycan dilini bilməlidir.
Modern.az-ın məlumatına görə, bunu elm və təhsil naziri Emin Əmrullayev jurnalislərə açıqlamasında bildirib.
"Burada rus bölməsi olması fərq etmir. Şagird öz tarixini, öz ədəbiyyatını öz dilində oxumalıdır. Burada xüsusi məntiq axtarmağa ehtiyac yoxdur. Şagirdlər onsuz da Azərbaycan dili fənnini öyrənirlər. Azərbaycan tarixi fənnini keçəndə artıq onların ana dili bilikləri olmalıdır. Məqsəd də budur ki, o bilik formalaşsın", - nazir qeyd edib.
O əlavə edib ki, rus bölməsindəki şagirdlərin Azərbaycan dili səviyyəsi ilə bağlı narahatlığımız var.
"Şagirdlər rus dilində tədris ala bilər, amma onların Azərbaycan dili yüksək səviyyədə olmalıdır", - deyə nazir bildirib.