Hər bir insanın həyatında önəmli qərarlardan biri təhsil sahəsindəki seçimidir. Bu seçim gələcək inkişafına, yaşamına təsir edir. Təhsil şəxsin bilik və bacarıqlarının təkmilləşməsində, şəxsiyyətinin formalaşmasında və dünyagörüşünün artmasında son dərəcə vacibdir. Son illər ölkəmizdə xaricdə təhsil almaq istəyənlərin sayı kifayət qədər artıb. Bu işdə bəzi şirkətlər vasitəçi rolunu oynayırlar. Bəs xaricdə təhsil şirkəti seçəkən hansı xüsusiyyətlərə nəzər yetirmək lazımdır? Xaricdə təhsil eksperti Vüsal Kərimli Modern.az-a açıqlamasında mözunu şərh edib "İlk olaraq yüksək nəticə, müəyyən beynəlxalq sertifikat qazanmaqla dövlət proqramı vasitəsilə xaricdətəhsil ən güvənli olandır. Burada dövlət proqramları nəticəsində qanunlar müəyyən edilir və o qanunlar dünyanın ən yaxşı, reytingli 500 universitinə dəvət alan tələbələr üçündür. İkinci qrupa Azərbaycanın Dövlət İmtahan Mərkəzi tərəfindən keçirilmiş blok imtahanlarından aşağı nəticə toplayan və universitetlərə qəbul oluna bilməyən gənclər daxildir ki, onlar xaricdə təhsil almaq üçün müraciət edirlər. Seçim edərkən xüsusilə Türkiyə, Ukrayna, Rusiya, Gürcüstan, Polşa kimi ölkələrə üz tuturlar".
Vüsal Kərimli qeyd edir ki, Təhsildə Keyfiyyət Təminatı Agentliyinin göstərişləri əsasında ölkələr üzrə mütamadi olaraq diplomu tanınmayan, nostrifikasiya edilməyən universitetlərin adlarını açıqlayırlar:
"Onlar müəyyən şərtlər çərçivəsində bununla bağlı Azərbaycan Respublikasının qanunvericiliyi ilə təsbit edilmiş qaydalar çərçivəsində təhsil verən universitetin diplomunu nostrifikasiya edirlər. Düşünürəm ki, təhsil şirkəti ilə universitet seçərkən ehtiyatlı olmaq lazımdır. Onlar üçün vətəndaşın gələcəkdə diplomunun tanınıb-tanınmaması çox maraqlı deyil. Əsas məqsədləri müştəridən pul almaqdır. Xaricə təhsil şirkətləri ilə gedən tələbələr ölkəyə qayıtdıqdan sonra problemlər yaşaya bilir. Çox təəssüf ki, vətəndaşların çox anlayışları olmadığı üçün asanlıqla aldana bilirlər".
Müsahibimiz qeyd edib ki, xaricdə təhsil şirkətlərinin təklif etdiyi universitetləri seçimdən öncə bu sahədə mütəxəssislərlə məsləhətləşmək vacibdir:
"Çünki hər universitetin diplomu nə bizim ölkəmizdə, nə də dünyanın başqa yerində, hətta həmin ali təhsil ocağının yerləşdiyi dövlətdə belə tanına bilər. Başqa bir məsələ isə diplomların təhsil müddəti məsələsidir. Eyni istiqamət üzrə tələbə Azərbaycan Respublikasının “Təhsil haqqında” Qanunundakı təhsilin müddətindən az təhsil alarsa, onun diplomu nostrifikasiya olunmayacaq". Gülarə Quliyeva