Azərbaycan universitetlərində, demək olar ki, bütün ixtisaslar üzrə təhsil alan tələbələrə mülki müdafiə və fəlsəfə fənləri tədris olunur. Zaman-zaman sözügedən fənlərin ləğv edilməsi ilə bağlı təkliflər səsləndirilir.
Bu il yenidən sosial şəbəkə və mətbuatda bu fənlərin ləğv ediləcəyi barədə iddialar yayılıb.
Modern.az mövzu ilə bağlı ali təhsil müəssisələri arasında sorğu keçirib.
Xəzər Universitetindən bildirilib ki, sözügedən fənnlər tədris edilir: “Həmin fənnlər ən vacib fənnlərdən hesab edilir və həmin fənnlərdən kredit almaq mütləqdir. Bu fənnlər elə-belə fənnlər deyil və tədrisdən çıxarılması mümkünsüzdür”.
Azərbaycan Dövlət Memarlıq və İnşaat Universitetindən qeyd edilib ki, ali təhsil müəssisəsində tədris Azərbaycan Respublikasının ali təhsil haqqında qanunların, normativ hüquqi aktlarına əsasən tənzimlənir:
"AzMİU-da "Mülki müdafiə"nin də daxil olduğu "Həyat fəaliyyətinin təhlükəsizliyi" fənni tədris olunur. Bu fənn özündə günümüzə dair ən vacib informasiyaları, bilik və bacarıqları əks etdirir. Məlum olduğu kimi son illər təbii fəlakətlərin, iş qəzalarının və bədbəxt hadisələrin sayı əvvəlki dövrlərlə müqayisədə sürətlə yüksəlir. Bu tendensiyanın fonunda gənclərin, mühəndis kadrların həyat fəaliyyətinin təhlükəsizliyinə dair biliklərə sahib olması xüsusi əhəmiyyət daşıyır. Fəlsəfə fənni isə təkcə bizim ölkəmizdə deyil bütün dünyada tədris olunur və şəxsiyyətin formalaşmasında, əldə olunan informasiyaların yaradıcı şəkildə emal edilərək bilik və bacarığa çevrilməsində müstəsna əhəmiyyətə malikdir. Hesab edirik ki, bu fənnlərin tədrisi vacibdir və tədrisdən çıxarılması məqsədə uyğun deyil”.
Azərbaycan Dövlət Mədəniyyət və İncəsənət Universitetindən verilən məlumata görə ADMİU-da hər iki fənn tədris olunur və hər ikisinin tədrisinə böyük önəm verilir: “Belə ki, dünyada və ölkəmizdə baş verən hadisələr mülki müdafiə qaydalarının təkcə tələbələr üçün deyil, bütün vətəndaşlar üçün nə qədər önəmli və vacib olduğunu bir daha göstərir. Buna görə də tələbələrin bu qaydalara dərindən mənimsəməsinə diqqət yetirilir. Fəlsəfə fənni isə bəzi ixtisaslarda zəruridir, bəzilərində isə seçim əsasında keçirilir. Yəni tələbə öz seçimi ilə estetika da keçə bilər, fəlsəfə də. Tədqiqatın əsasında fəlsəfə dayanır. Xüsusən, şünasların bu fənni dərindən bilməsi önəmlidir. Hər iki fənnin gələcəkdə tədrisdən çıxarılması ilə bağlı heç bir əsas yoxdur”.
Azərbaycan Texniki Universitetindən bildirilib ki, universitetdə həmin fənnlər tədris edilir: “Sözügedən fənlər dövlət tərəfindən müəyyən edilən fənlərdir. Bu səbəbdən də həmin fənlərin tədris proqramından çıxarılması universitetin səlahiyyətində deyil”.
Azərbaycan Universitetindən verilən məlumata görə, universitetdə artıq bir neçə ildir ki, "fəlsəfə" fənninin yerinə "multikulturalizm" fənni tədris olunur: "Multikulturalizm" fənni bütün tələbələrə tədris olunmur, müəyyən ixtisasların təhsil proqramında seçmə fənlər blokunda yer alır. Mülki müdafiə fənni isə bəli, bütün ixtisaslarda tədrisi aparılır. İxtisaslar üzrə təhsil proqramları 5 illik hazırlandığı üçün tədrisdən çıxarılması hələlik mümkün deyil”.
Azərbaycan Dillər Universitetindən bildirilib ki, hər iki fənn ADU-da tələbələrə tədris olunur: “Əlbəttə, hər ikisi tədrisin vacib istiqamətlərindən biridir. Gələcəkdə tədrisdən çıxarılması planlaşdırılmır. Çünki bu dövlət standartıdır, tədrisi vacibdir”.
Bakı Slavyan Universitetindən verilən məlumata görə, BSU-da fəlsəfə və mülki müdafiə dərsləri tədris proqramına uyğun olaraq tədris olunur: “Hazırda bu iki fənnin tədris proqramından çıxarılması gözlənilmir”.