Bir neçə gün əvvəl Rusiyanın xarici işlər naziri Sergey Lavrov Moskva Dövlət Beynəlxalq Münasibətlər İnstitutunda (MDBMİ) keçirilən tədbirdə Qarabağla bağlı bir sıra fikirlər səsləndirib. O, "Dağlıq Qarabağ problemi"nin Ermənistan tərəfindən həll edildiyini iddia edib. "2022-ci ilin sonunda (6 oktyabr 4-tərəli Praqa görüşü nəzərdə tutulur – red.) Ermənistan rəhbərliyi Avropa İttifaqının iştirakı ilə Azərbaycanla 1991-ci il sərhədlərinin tanınması haqqında saziş imzalamaqla Dağlıq Qarabağ problemini həll edib", - Lavrov deyib.
Rusiyanın baş diplomatı əlavə edib ki, Cənubi Qafqazda normallaşma həll edilməli olan bütün digər problemlər kontekstində, o cümlədən Qarabağ probleminin prinsipial həlli kontekstində baş verməlidir.
Modern.az-ın məlumatına görə, politoloq Eldar Namazov Lavrovun səsləndirdiyi fikirlərə münasibət bildirib.
O, Lavrovdan bu kimi açıqlamaları dayandırmağı tələb edib.
"Qarabağ problemi nə Ermənistan, nə də Nikol Paşinyan tərəfindən “həll edilməyib”. Ərazi bütövlüyümüzün bərpası, torpağımızda separatizmin kökünün kəsilməsi Azərbaycan dövləti tərəfindən həll edilib. Ordunun gücü və şəhidlərin qanı ilə! Orada “bitirməyə” heç nə qalmayıb", - Eldar Namazov qeyd edib.
O, Azərbaycan və Rusiya prezidentlərinin 2022-ci il oktyabrın 31-də Soçi görüşü zamanı İlham Əliyevin səsləndirdiyi fikirləri xatırladıb. "Qarabağ münaqişəsi artıq tarixdir, o, iki il əvvəl həll olunub. Ona görə də bu kontekstdə praktiki olaraq müzakirə ediləsi heç bir məsələ qalmayıb. Ermənistan-Azərbaycan münasibətlərinin normallaşdırılması isə ciddi addım tələb edən formatdır", - dövlət başçısı qeyd edib.
"İlham Əliyevin bu bəyanatından sonra Rusiya Xarici İşlər Nazirliyinin hazırladığı prezidentlərin birgə bəyanatından iki müvafiq məqam çıxarılıb. Ona görə də biz Qarabağ probleminin “həlli” və Ermənistan-Azərbaycan münasibətlərinin müharibədən sonra normallaşması yollarını bir-birinə qarışdırmaqdan əl çəkməliyik. Birincisi artıq tarixə çevrilib, ikincisi üzərində iş gedir.
Rusiya prezidenti Soçidəki görüşdən sonra, o cümlədən Azərbaycana son rəsmi səfəri zamanı bu mövzuya qayıtmadı. Xarici işlər nazirinin öz prezidentindən nümunə götürməsinin vaxtı çoxdan çatıb.
Düşünürəm ki, Azərbaycan Prezidentinin İtaliyanın Sernobbio şəhərində keçirilən forumda Ukraynanın ərazi bütövlüyünün tanınması və anti-Rusiya sanksiyalarına qoşulmaması barədə bu yaxınlarda etdiyi çıxışında da məhz bu mesaj nəzərdə tutulur".