Türkiyənin Diyarbəkir vilayətində 19 gündür axtarılan 8 yaşlı Narin Güranın meyiti tapılıb.
Modern.az xəbər verir ki, bu barədə ölkənin daxili işlər naziri Ali Yerlikaya "X" hesabında yazıb.
Narinin cəsədi Tavşantəpə kəndi ərazisində aşkarlanıb.
“Təəssüf ki, Diyarbəkirin Bağlar bölgəsinin Tavşantepe kəndində itkin düşən qızımız Narinin cansız bədəni axtarış-xilasetmə qruplarımız tərəfindən tapılıb. Narin qızımıza Allahdan rəhmət, ailəsinə başsağlığı veririk”,- nazir yazıb.
Yerli mətbuat yazır ki, rezonans doğuran iş çərçivəsində 21 nəfər saxlanılıb. Saxlanılanlar arasında Narinin anası Yüksel Güran, atası Arif Güran və qardaşı da var.
Daha əvvəl hadisə ilə əlaqədar azyaşlının əmisi, Tavşantəpə kəndinin muxtarı Sami Güran həbs edilib.